5.5吋SH-03G 2,100fps捕Phone捉影

日系手機因鎖機問題，近月幾乎絕迹於市場，苦了一班哈日機迷。等了又等，夏季首部日系機王SH-03G終於擺脫「枷鎖」重臨香江，而且還帶來2,100fps超慢速播放能力，令水滴、爆氣球等高速畫面可細緻重現，加上5.5吋窄邊靚芒，拍友一定Like！

SH-03G
售價︰$6,580

快慢隨意調校

拍攝動態影像，幀數（fps）愈多畫面愈細緻，坊間高階DV大約有500fps左右，雖然SH-03G只有210fps或120fps可揀，但卻支援影片補償技術，重看時能把偵數增大10倍至2,100fps。小記拮爆載滿水的氣球時，水花散開一刻真係慢鏡重播咁款，仲可選擇慢速、中慢速或超慢速，並可逐Part加快減慢，速度任意調校。如早前推出的SH-01G，它亦取到Ricoh GR認證，成像質素有保證，並提供F1.9大光圈、4K錄影、全景及縮時拍攝等功能；唯一缺點係冇美顏模式，而且前置鏡頭位於屏幕下方，Selfie時要重新適應。

優化三原色

影相咁靚，屏幕亦有番咁上下，新機擁有5.5吋1,920×1,080解像度，並內置S-PureLED三原色技術，紅、藍、綠特別鮮艷飽和。另一亮點係EDGEST窄邊框技術，屏幕三邊只有牙籤咁幼，令機面得以收身至141×76mm，比同是5.5吋芒嘅iPhone 6 Plus細一成有多，女仔纖纖玉手都拎得自在。另留意屏幕還支援縮放及VeilView功能，前者將畫面縮小以便單手操作，後者則在屏幕加入防窺花紋，咁就唔怕畀人偷睇WhatsApp！

有圖為證，屏幕邊得牙籤咁幼！

提供自動、手動、黑白、全景及Time Lapse等拍攝模式。

畫面可以縮放，方便單手操作。

設有指紋識別

叫得做夏季機王，規格當然唔輸蝕，預載Android 5.0系統，並選用Qualcomm Snapdragon 810八核心處理器及3GB RAM，開Apps撥頁非常流暢。惟留意此CPU熱量始終有番咁上下，跑得耐機身會有微熱，有待改善。有見手機保安日受關注，它順應民意加入指紋識別器，屬Sharp首部代工手機加入此技術，最多可登記3組指紋，鎖芒鎖Apps更安全！特別一提，雖然此機經水路到港，但可兼容本地4G網絡，對應高速LTE-A，美中不足係只有英、日兩種語言，用起嚟唔夠親切。