香港街景RC Drift $2,500遙控甩尾

副刊

車場鋪有地氈賽道及防撞欄，減低阻力並提升安全度，設計細心。

「Calling總台，呢度係交通部陳Sir，屯門懷疑有非法賽車，架架改晒裝飄移入彎，要求增援Over！」咪住先陳Sir，呢班車友冇錯係玩緊飄移，但只係1:10甩尾專用嘅RC Drift遙控車，連埋改裝都只係$2,500貨仔，由於車場搭建咗全港首個實景賽道，影相睇片先至咁像真啫，陳Sir收咗工不如過嚟齊齊甩尾鍊番轉啦！

車款包羅萬有

「飆……」甫進入這間位於屯門的遙控車場Graver，震耳欲聾的甩尾聲已響徹全場，再定眼一看，車款更是包羅萬有，如Toyota AE86、Dodge Challenger、Nissan Silvia S15，連大架少少嘅Hiace同Alphard都有，全部像真度極高，部分更加入頭唇尾翼包圍，配合全車拉花，極富心思。車場創辦人阿龍一邊玩車、一邊回應：「遙控車有一個好處，就係$220左右便可隨意變換車殼，就算現實中揸唔到嘅Dream Car如法拉利、保時捷，遙控車都可幫你圓夢。而且好多都係Lexan專用塑料製造，重量輕而剛性高，非常耐撞。」

親切路牌賽道

車場設計成香港街景，增加玩家投入感。

RC Drift以甩尾為先，過程同真車一樣咁刺激。

阿龍希望車場可提供一個平台，助本地車手提升技術。

玩RC Drift很簡單，基本上一架車一條路就玩到，為何要專登起個車場呢？玩咗十幾年遙控車嘅阿龍解釋︰「遙控車好易玩上癮，亦容易玩到冇癮，因為喺街玩要日曬雨淋，仲要被人歧視甚至被人趕，最慘係玩得叻都冇人知。所以兩個月前我同Partner喺香港搞車場，希望一班同好有個落腳點互相提升技術，又可幫初學者快啲上手，唔使浪費金錢喺冇用嘅零件上。」

一班同好圍埋Tune車係RC Drift另一樂趣所在。

全場最誇係BoomRacing 6×6軍用貨車，全金屬製身價高達$4,000。

新手只需$2,500就可做「車主」，仲有不同遙控車如Mini-Z等選擇。

阿龍稱，車場共投資了6位數字，並首創以香港街景作主題，賽道彎多直路短，建有斜台高架橋，仲有香港常見嘅藍底白字路牌，印有「九龍」、「中區」等字樣，勁親切！

Tune車分勝負

為方便車友改裝，Graver車場還與著名製造商Asiatees合作，以優惠價發售零件。

解剖遙控車
遙控器
控制頻道、油門及迫力，高階版更設有觸控屏，可實時進行微調，相當專業，售價由$700起。

車架
遙控車的靈魂，基本上已有齊車殼支撐座、前直軸等配件。圖為入門級3Racing Sakura D3，售$715。

阿龍指，一套入門RC Drift大約賣$2,500，當中包括車架、輪胎、摩打、轉向、電池及遙控器等各式零件，若想玩得專業啲仲可以Tune車。「唔同賽道要有唔同Settings，我哋通常會一邊玩一邊改，計算輪胎硬度、齒輪Gear Ratio、四驅Counter Steer同電變值等，玩落同真正鍊車冇乜分別！」

輪胎
一般為2.2吋，又分甩尾胎等種類。輪胎四件Set套裝約售$98，而車軨每Set售$30~$90不等。

電子零件
計有摩打、轉向、電變及鋰電池等，用以控制速度、扭力、電流及放電速度等，售價按牌子及款式而定。

拉花貼紙
玩家可自行美化車身，貼紙更不乏模仿日本D1款式，等大家貼到真車一樣，每張約$82。

小記聽落一頭霧水，咁Pro嘅玩法未必啱新手，如果只係想好型咁甩尾入彎，有乜必殺技呢？阿龍表示：「最簡單係用硬胎或專用甩尾胎，加上我個車場改用地氈地，比坊間常見嘅石地好Drift好多，連上斜都可以飄移，就知好好甩啦！」他還會不定期舉行比賽，以飄移準繩度、長度、速度、與圍欄距離等來評分，勝出者可獲遙控車零件作獎勵，鼓勵玩家提升技術。

Graver 車場資料

地點︰屯門建旺街4號

利通工業大廈A座12樓4室

營業時間︰3:00pm~2:00am

收費︰$20/小時、$80/日（星期一至四）；$25/小時、$100/日（星期五至日及公眾假期）；$600（月費）

查詢電話︰6082 5231

其他車場選擇：粉嶺PYC遙控車場

位於粉領黃崗山跳蚤市場內，適合1:10以下電動或油動遙控車進行比賽，現場備有風槍、計分系統等配套。收費方面星期一至四為$80全日，星期五、六或公眾假期則$100全日。