小米4i 5.12開賣美顏估歲數

最近全城熱玩How-Old.net估歲數，個個返老還童呃Like，你一句「睇吓我幾後生？」我一句「個妝咁厚梗係Check錯啦！」準確度還是其次，最重要係氹到大家開心。剛於香港發布的小米4i亦有此功能，美顏自拍時可以Check埋歲數，配合5吋全高清屏幕及八核心處理器都係賣$1,599。新機將於5月12日正午12時於官網開售，想買的話記得睇準時間！

售價︰$1,599

多色機身選擇

近年小米好積極，除咗喺內地發表新機，還會照顧海外市場推出國際版，上周便在印度發表全新小米4i，估唔到佢咁快嚟到香港。它用上一體成形機身設計，用料由小米4的金屬改為塑膠，僅厚7.8mm、重130g，握感更輕更舒適，並提供黑、白、黃、天藍及粉紅5色，感覺較為清新，少了一份山寨味道。當然一體成形有辣有唔辣，例如冇得換電，同時不能加裝記憶卡，幸好3,120mAh電池可續航1.5天，反而全機僅得16GB ROM，冇得插記憶卡唔夠用喎！

自動分析年齡

買得小米都係貪佢高性價比，新機用上5吋全高清屏幕，像素密度達441ppi，畫面鮮艷奪目，並內置「陽光屏」技術，屏幕會按環境而自動調節對比度，所以黑位特別出眾，睇相一流。提到靚相，不得不說其1,300萬像素後置及500萬像素前置鏡頭，前者支援F2.0大光圈、HDR及1,080p攝錄，後者則對應80度廣角自拍，最正係系統懂得分析自拍者嘅性別同年齡，按歲數自動美白兼美瞳，現場連Model都玩到不亦樂乎。