長測Nissan Qashqai慳油得寬心

日前借來日產（Nissan）Qashqai作4天3夜詳測，並到過不少地方，包括西貢、赤鱲角機場及下白泥等。不少朋友問：「究竟車名點讀？」Qashqai讀作「Cash卡埃」，若嫌饒口可索性簡稱QQ。雖然Nissan屬日本品牌，但Qashqai是在英國設計及生產，具備易操控特性、穩定可媲美不少Hatchback，而且實用度高，$29萬有找，準車主有得諗。

售價：$285,800起

女士揸特別Cool

Qashqai的外形糅合了SUV和五門揭背房車的優點，車身線條富肌肉感，配合回力鏢形Bi-LED頭燈和19吋合金輪圈，形象動感又時尚，女士揸出街Cool得很。雖然車身離地距比一般三廂式私家車高，以筆者5呎多少少的高度，上落車都好輕易。A柱設計粗幼適中，轉大彎時可以睇到路壆，唔怕轉多咗挨埋壆。兩邊側鏡稍大，易於掌握車身兩邊的情況。雖然沒有後波鏡頭，只有後泊Sensor，但單靠睇鏡倒車或泊車，睇位其實好容易。

寬敞車廂實用度高

預載了Keyless Go無匙系統及按鈕式引擎起動系統，進出車廂和啟動引擎都毋須取出車匙，加上駕駛席設電動調校功能，十分方便。多功能軚環和波棍均有真皮包裹，握感極佳。波棍台後方的飲品架，採用深嵌式設計，放入大杯裝咖啡，凸出的部分不多，不會妨礙波棍操作，足見設計貼心。在五座位布局下，尾箱仍有430L的載物量，揸佢接載親友到機場，擺放了兩大件行李仍有好多位剩，而且絕非犠性後排乘坐空間，小記一家五口去送機，坐後排的三位家人都直豎拇指讚好，無論頭部、腿部以至肩膊都有可觀活動空間。

只需踩Brake並按START STOP ENGINE鍵，即可啟動引擎，十分方便。

只需踩Brake並按START STOP ENGINE鍵，即可啟動引擎，十分方便。

尾箱擺放兩大件行李綽綽有餘，若需要更大置物空間，把椅背向前翻平即可。

大面積玻璃天幕，開揚感十足。

長途駕駛耗油量低

Qashqai搭載的2.0L直四引擎導入了Twin VTC技術，可因應車速而改變進、排氣時間，配合Advanced XTRONIC CVT M-7七前速自動波，加速爽快又線性，過程沒半點突兀，兼可幫到手慳油。駛入多彎的西貢或下白泥，馬步比不少同級SUV還要穩，由減速、轉向到出彎過程都十分流暢。於駛入機場的一段高速公路，也不會出現飄浮不定，行車動態非常紮實。