板王初試！GausWheel魔輪速滑
近年香港出咗唔少世界級單車和滑板冠軍，間接令這兩種運動人氣大增。但同時踩緊板又像踏單車嘅玩意，大家又玩過未呢？講緊嘅係來自匈牙利嘅「板車」混合體GausWheel（魔輪），自去年引入香港已成為年輕人嘅潮物。今次一於請國際滑板花式個人賽金牌得主，有香港板王之稱嘅俊仔（陸俊彥），挑戰魔輪嘅入彎、煞車等技巧，佢試完仲話落斜速滑幾有快感！
上板：踩開板易平衡
GausWheel由一個ABS聚合物支架，配上20×2.125吋標準單車輪胎，輔以前臂的膠滑輪組成。外觀似一個冇座墊、冇腳踏嘅單輪車，框架兩側備有防滑踏板，似足滑板咁以單腳踩地推進，小記順理成章約埋板王俊仔一試究竟。到咗將軍澳海濱長廊「試車」，俊仔即時右腳踏板，左腳用力踩一下，未幾「噗通」一聲車就翻了。反覆試了5分鐘左右，俊仔開始摸熟上板竅門：「滑板有4個轆，打側身前後腳踩上去時，靠身體重心前後來穩定滑行。但GausWheel只得1個單車輪，踏上去一刻要筆直站立，再靠輕微擺動身體方能平衡，這點同踩板完全唔同。」不過他認為玩開滑板的話，攞平衡點會較容易，只是要習慣不同的擺動方向。
操控：轉彎大花式少
玩滑板時，以腳助跑滑幾下，速度感便來了。但初玩GausWheel點解好似咁慢嘅？俊仔搖搖頭說：「其實GausWheel轆夠大，走起來可以好快，但初玩未掌握好平衡，千祈唔好太急上板，事關前臂膠滑輪轉向相當敏感，上板不當翻車時肯定撞瘀膝蓋。」後來見俊仔慢慢加速，上板爽咗，速度終於返嚟！
直路愈走愈順，轉彎又點呢？只見俊仔臨入彎前，將GausWheel偷闊些少位，他解釋：「玩滑板過急彎時可以屹起前轆靈活轉向，但玩GausWheel時隻腳套進框架內，前端有兩舊白色膠頂實膝蓋借力，變相動作被鎖死，故較難調整姿勢。」正因為雙腳活動受到限制，連帶俊仔最擅長的跳躍、掟彎等花式也不易做出，簡單跳上矮石壆冇問題，但要連人帶板飛越障礙物就很困難。
熟練：落斜速滑最爽
講到底GausWheel要點玩先至最過癮呢？俊仔直接帶小記到單車徑天橋位玩落斜。「GausWheel講求直線速度，操熟後玩落斜路段零舍刺激，皆因身體毋須兼顧助跑及平衡，可專注應付轉向同享受速滑快感。」他提醒初學者，要善用框架頂端的煞車掣，平時玩不妨拉出Brake來手持使用，到玩得叻之後可略為蹲低身體減輕風阻，兼且將煞車掣插於前方直接操作，猶如滑雪姿勢般增加速度感。不消一會，只見俊仔玩到滿頭大汗，他笑言：「GausWheel嘅下身運動量幾大，女仔玩足一天分分鐘可以收身呢！」
4大操控技巧
板王試完GausWheel已掌握到操控重點，各位想試玩的話，可留意以下4大技巧：
緩慢煞車：高速滑行時不要急煞，最好分階段緩慢煞停以減慢速度，然後單腳落地。
站立平衡：由於只有1個單車輪，故踏上去後筆直站立，會較易掌握平衡，熟練後才玩不同姿勢。
踩地推進：右腳上板後，左腳便能踩地推進，姿勢似足滑板，但初學者切忌過於急進，以免翻車。
攞位入彎：GausWheel的車輪較大，滑行時只要輕微左右擺動身體即可改變方向，而入彎前記得攞闊一點位。
Tips：換幼輪胎更快
開設單車店Bike Depot的Roy，從網上得悉GausWheel於歐洲爆紅後，便急不及待商討香港代理事宜。「GausWheel是源自匈牙利的代步工具，利用長窄車身特點來穿梭橫街窄巷，深受年輕人歡迎。由於GausWheel是用單車輪胎，故可透過更換幼身公路輪胎，將時速提升至20km/h，喺單車徑上玩更加爽快。」
撰文：廖俊斌
攝影：蔡浩文
查詢電話：2719 9820