5.2吋Moto X二代激罕木紋

手機用料通常都係塑膠或者金屬，矜貴啲會加入皮革，有冇諗過木都可以用嚟做手機呢？Motorola第二代Moto X，5.2吋直板圓角機身睇落平平無奇，卻於弧形背部加入木紋設計，不但令外形更突出，手感仲相當特別！

每部紋理獨一無二

上代Moto X推出咗超過一年，起初以DIY配色及流暢介面作賣點，今次新機雖然同樣叫作Moto X，但型號後加上「2nd Gen」，即係二代咁解，喺美國當地仍提供Moto Maker供用家自選物料和顏色，只係香港暫時未有相關服務，好在行貨返咗最受注目嘅White Bamboo配色。新機沿用AMOLED屏幕，只係Size由4.7吋增大至5.2吋，解像度亦相應提高至1,920×1,080，配合窄邊框設計令機身不致太大。另加入機面雙喇叭，音量輸出更強，最特別當然係機背嘅木紋，質感特別之餘，每部機嘅紋理都獨一無二。

Android 5.0系統

新機內置Qualcomm Snapdragon 801四核心處理器及2GB RAM，可惜只得16GB內存，又冇得外加記憶卡，鍾意下載Apps和音樂嘅用家未必夠用。至於機背備有1,300萬像素鏡頭，配合雙LED閃光燈，用來影人像時燈光更加均勻。軟件方面，新機用上最新Android 5.0系統，布局和功能與原生介面好似，並加入一系列新功能，當中「移轉」可透過QR Code過舊機資料；另一特別功能有「智慧手勢」，遇上來電、鬧鐘響起時，用手掌於屏幕上一揮即可靜音或延後響鬧；而拎起手機並輕輕將手腕扭兩下，即可啟動相機。