音樂人品評！4大Music Apps串流實測
無論閣下喜歡以音樂治愈心靈，抑或當作生活消閒，聽歌總係一件賞心樂事。自從串流音樂興起，大家唔使再過落街撲CD、上網搵Source嘅日子，透過流動網絡便有成千上萬歌曲任揀，一按串流即聽！咁啱近排有新Music Apps加入戰團，小記特別搵嚟音樂人、前RubberBand成員藝琛，試玩《JOOX》、《KKBOX》、《Spotify》、《MOOV》4大音樂Apps，睇吓邊款最好玩！
藝琛點揀音樂平台？
身兼作曲、監製及伯樂音樂學院導師的藝琛，經常聽不同音樂。「一來我鍾意音樂，聽歌可以放鬆心情；二來聽吓唔同類型嘅音樂，可激發創作靈感。」他續道：「以前要聽歌，一係自己搵Cassette、CD，一係靠電視、電台，仲要佢播乜就聽乜，冇乜選擇。串流音樂Apps除咗歌庫夠大之外，最正係聽眾可自己選擇聽甚麼歌。」芸芸音樂Apps之中，藝琛會點揀呢？他表示：「首先介面要靚，其次要簡單易用。但最重要係歌庫，最好數量、類型夠多，希望一個平台可以集齊Rock、R&B、Jazz等不同音樂。」
《JOOX》本土元素
《JOOX》今年初殺入香港，屬內地科技龍頭騰訊新作，勝在介面設計簡單，一掃即可從「我的音樂」、「發現」、「電台」3個主頁中轉換，當中的「發現」可顯示JOOX排行榜、精選歌單等項目，想聽最Hit歌曲超方便。
藝琛Comment：「最鍾意『電台』選項，入面將歌曲分類成『港樂主義』等，內有『老香港地道情』、『八十年代曲』等分類，勁多香港經典舊歌，本土元素好重！」
售價：免費（Android、iOS）
《KKBOX》音樂新聞
要數串流音樂嘅先頭部隊，必數2004年誕生嘅《KKBOX》，2009年正式進軍香港。其介面分為「我的音樂庫」、「線上精選」、「一起聽」等。當中以「一起聽」最特別，用家可Follow其他用家「台長」，齊齊聽佢揀選嘅歌曲，十足聽電台DJ咁。
藝琛Comment：「呢隻App除咗有音樂聽之餘，仲有好多關於音樂嘅文章，例如歌手專訪、碟評等，令內容更多元化。」
售價：免費（Android、iOS、Windows Phone）
《Spotify》心情分類
來自瑞典嘅《Spotify》於2008年推出，吸引好多歐美用家使用，直至2013年才登陸香港。有別於同類Apps，《Spotify》基本設定擺晒喺頁面側欄位置，操作簡單。而主頁大部分推介都係外國歌手，鍾意聽外語歌曲嘅樂迷應該啱口味。
藝琛Comment：「最鍾意係佢以風格、心情等作分類，好似Travel、Sleep、Chill、Focus等，讓聽眾可根據當下心情聽番啱Mood嘅歌曲。」
售價：免費（Android、iOS、Windows Phone）
《MOOV》自家內容
土炮代表《MOOV》屬PCCW旗下音樂平台，仲不時搞網上音樂會。此App介面採用橫拉側欄設計，主要分為「MOOV推介」及「HMV達人歌單」，前者提供新歌、音樂旗艦、排行榜等內容，後者將歌曲以流行、年代、曲風等分類。
藝琛Comment：「《MOOV》提供好多MV，好似自家製嘅MOOV Live演唱會，甚至近期熱爆嘅《中國好聲音》節目都有。」
售價：免費（Android、iOS）
測試篇：Round 1：歌庫搜尋
老實講，每隻App都標榜歌庫強勁，不過各自都冇明確表示歌曲、歌手或專輯數量。既然冇實際數字，一於搵藝琛試吓搜尋佢常聽嘅歌手，睇吓邊隻App最齊！香港地區方面，藝琛近排聽開J.Arie，鍾意佢唱歌柔和舒服，《KKBOX》、《MOOV》、《Spotify》都有齊J.Arie出道至今兩隻專輯嘅歌曲，唯獨是《JOOX》就搵唔到。再試搵勇奪第25屆台灣金曲獎最佳新人獎嘅李榮浩，藝琛大讚佢有個人風格，極具音樂才華，結果4 隻Apps都搵到佢嘅歌曲，不過《Spotify》淨係搵到最新專輯。而終極之選，藝琛決定以美國Metal Rock樂隊Dream Theater挑戰，《JOOX》搵到17個專輯共208首歌曲；《Spotify》搵到18個專輯共217首歌曲，仲有埋推出年份；而《KKBOX》搵到20個專輯，但部分專輯重複；《MOOV》僅得10個專輯，呢回合相對輸蝕。
Round 2：音色選項
4大Music Apps都提供音色選項供調校，《KKBOX》分為一般及高音質（320kbps）；《MOOV》提供Standard（128kbps）及Ultra（320kbps）兩級；《Spotify》有標準（96kbps）、高（160kbps）及極致（320kbps）3級。分得最仔細係《JOOX》，有流動網絡及Wi-Fi網絡兩類，以每首歌嘅容量區別，前者最高為細緻（每首3~4MB），後者最高為高品質（每首7~10MB），即320kbps音質。小記試玩多日，連接3G或4G網絡下，串流歌曲都未有Lag或窒吓窒吓，等候串流嘅時間極短，幾乎一按即播。
Round 3：試聽詳情
4隻Apps都提供一定試玩時間，當中《JOOX》以WeChat或facebook登入有30天免費試用；《Spotify》只要以信用卡登記亦有30天任玩；而《MOOV》有14天試用期，《KKBOX》以facebook註冊可免費試用7天。試用期內大部分功能與收費計劃相同，包括自選歌手歌曲及離線播歌等，過期後功能便有所局限，以《KKBOX》為例會限制線上聽歌時間；《Spotify》更只能收聽電台歌曲，亦會間歇出現廣告。
而4隻Apps均以每月計費，《JOOX》分為$48/1個月及$138/3個月服務，《KKBOX》每月費用為$65（2月28日前優惠價$49），《MOOV》每月則收$49（2月28日前優惠價$38），而價錢最貴係《Spotify》，每月收費$68。
達人教路：資深耳機玩家Cato：「一般樂迷夠用！」
「傳統CD轉換成數碼音樂檔大概是1,141kbps，串流質素大概是CD的1/3，與一般MP3的320kbps相若。這種壓縮程度可算是保留到最多音樂細節，又可節省數據流量的方法，毋須以高級耳機或耳擴等器材，音色都『見得人』。串流音樂原本是為了方便用家，例如有時CD、無損音樂檔尚未推出，串流便可搶先一步試聽，比之以往方便。又例如有時未及將CD轉換成數碼檔案時，音樂Apps便可即時滿足樂迷。」
總結：期望高清音樂串流
經過3回合測試，以《Spotify》及《KKBOX》的歌庫較啱藝琛嘅口味，多聽外國歌曲的話可揀前者，聽華語歌曲的話則可選後者；而《JOOX》音質分得最仔細，不過藝琛以手機試聽串流音樂後，感覺其實分別不大。期望日後有24-bit 96kHz等高清音樂串流服務啦！
撰文：林子聰
部分攝影：胡振文
場地提供：伯樂音樂學院