工廈變沙灘 笨豬跑大作戰

室內主題派對場地

室內沙灘嘅概念唔算新，但真係落手落腳喺工廈大搞，Sand House可說是香港首間。老闆Peter表示：「我之前喺台灣高雄嘅商場玩過室內沙灘，覺得大有可為，所以諗住喺香港搞番間，將佢包裝為主題Party場地。月初唔少人喺facebook開始討論Sand House，話生意少、難回本云云，其實當時只開業咗兩星期，好多人連Sand House係乜都唔知。」

充氣遊戲碌地沙

小記最關心係場內嘅遊戲好唔好玩，一來室內嘅樓底唔高，二來開揚感始終差啲，最唔同係室內沙灘嘅沙又滑又涼。Peter解釋：「我哋不時喺沙上灑水，以減低飛沙走石嘅機會，又會用紫外線消毒，玩都玩得衞生啲。」遊戲以充氣玩意為主，一嚟到已準備好沙灘泡泡足球和移波波，前者備有兩種尺寸嘅Bubble，着住佢便可以4 Vs 4形式撞開對手，再將沙灘波射入龍門。如想玩得輕鬆啲則可試吓移波波，充氣裝置設有兩條賽道，每邊備有7個送風口將波波吹起，玩家要鬥快用豆袋將所有波波擊落。

移波波（Floating Ball）玩法簡單，需用豆袋將浮起嘅波波掟低。	「大希臘」主題房面積寬敞，可容納多人聚會，仲有部足球機過手癮，每鋪$5。	「圓形度假屋」有張望見都好舒適嘅吊椅，同朋友傾偈就最啱。

笨豬跑挑戰難度

至於場內最大型嘅充氣玩意要數笨豬跑（Bungee Run），設有兩條長長嘅充氣跑道，充氣後差不多佔上半個沙灘！玩法係將橡筋繩扣喺玩家身上嘅安全衣，然後玩家要喺跑道盡力向前跑，將手上嘅魔術貼黐得有咁遠得咁遠，可供二人同時作賽，或玩埋隊際接力都得。由於玩家要同背後嘅橡筋繩角力，用力衝刺後一定會被橡筋拉到一仆一碌，所以玩嘅時候必須戴上頭盔；而橡筋繩鬆緊度可任意調校，魁梧男生同嬌小女生都可同場比試。Peter話仲有人肉足球機、充氣棒球場、飛套圈等充氣遊戲可玩，全部從美國訂回來呢！

射龍門看似容易，但要射中有分數嘅窿窿真係幾難。	泡泡足球嘅Bubble有大細尺寸選擇，女生可揀番個細波玩。	笨豬跑橡筋繩有相當大回彈力，要着齊裝備先玩得！

特色Party Room

玩完想抖吓，場內設有兩間特色Party Room，包括以希臘風格裝修的「大希臘」主題房，以及設有吊椅等設備的「圓形度假屋」，食吓嘢或玩吓Table Games都得，「大希臘」主題房內還設有足球機，手癮起入$5即可玩一Round。現場提供好多組合嘅Book場服務，以最多人揀嘅周末周日連一款充氣遊戲聚會套餐為例，8人起便可訂到「圓形度假屋」同室內沙灘，其他沙灘足球、沙灘飛碟同紙牌遊戲就任玩，試業優惠價每位$168可玩到4小時，想玩其他充氣遊戲則可以逐樣租。另有充氣遊戲計劃可揀，以兩小時劃一收費計算，組合都幾靈活。

安全衣背後有雙重扣，用以固定笨豬跑的橡筋繩。	巨型的充氣賽道，可供兩人同時競賽。	Sand House

台灣室內打沙排

Peter去過台灣高雄嘅室內沙灘，先至有感而發籌劃Sand House，不過論場地同玩法，呢個位於高雄環球購物中心嘅「室內沙灘排球場」，同香港確實幾唔同，前者位處商場內兼樓底較高，日頭時間主要畀大家玩沙，到下午5時之後便可預約打沙灘排球，每小時800台幣，計落都唔算貴。

網址：www.facebook.com/zyvolleyball

聚會套餐（B）

時 段：周末周日6:00pm~2:00am

人 數：最少8人

包 括：毛巾、飲品、紙牌遊戲、沙灘足球、沙灘閃避球、沙灘飛碟、隨機充氣遊戲、淋浴設施等

優惠收費：$148/位（3小時）、$168/位（4小時）

充氣遊戲計劃（B）

時 段：2小時

人 數：15~25人

包 括：毛巾、飲品、紙牌遊戲、沙灘足球、沙灘閃避球、沙灘飛碟、充氣遊戲（隨機×2、自選×1）、淋浴設施等

優惠收費：$2,788（2小時）

遊戲租借費用

笨豬跑（Bungee Run） $2,100（3小時）

移波波（Floating Ball） $1,000（3小時）

射龍門（Football Fever） $800（3小時）

泡泡足球（Bubble Football） $2,400（2小時）

（另有其他套餐選擇，收費詳情以官網為準。）

Sand House資料

地 址：觀塘開源道77號業發工業大廈一期6樓D室

查詢電話：9819 1444

網 址：www.sandhousehk.com

撰文：布偉倫

攝影：陳富權

模特兒：Elke（Zmodel）