D5500親民單反捽芒對焦

隨着智能裝置興起，相信大家對篤芒唔會陌生，唯獨是單反相機就唔係部部有觸控功能。為迎合用家需要，Nikon終於為旗下單反D5500，首建3.2吋側揭式觸屏，聽落好似冇乜驚喜，但內裏乾坤係植入「指定觸控Fn」功能，可輕鬆捽芒揀對焦點等設定。新機連18~55mm Kit鏡定價$6,980夠晒親民，預計2月初發售。

單反玩篤芒，對焦冇甩拖！<br>售價：$6,180（淨機身）、$6,980（連18~55mm鏡頭）、$8,580（連18~140mm鏡頭）

單反玩篤芒，對焦冇甩拖！
售價：$6,180（淨機身）、$6,980（連18~55mm鏡頭）、$8,580（連18~140mm鏡頭）

指定觸控Fn功能

D5500沿用上代D5300的3.2吋側揭式屏幕設計，有利高低角度取景，仲可翻芒玩自拍，而且篤芒反應靈敏，睇相時亦可放大縮小。作為Nikon首部篤芒單反，新機加入「指定觸控Fn」功能，當使用觀景器取景時，屏幕會暫時關閉畫面，不過用家仍能以手指捽芒，用來調校對焦點、感光度、光圈等，代替操作轉盤或十字桿使用。小記實試後發覺揀對焦點相當方便，捽一捽就可以由一邊跳到另一邊，唔使逐吓咁麻煩。

420g輕巧機身

傳統單反總係大大部，唔係個個啱用，故新機大幅減磅，用上一體式結構的碳纖複合物料，令機身重量只有420g，而且體積略為縮減，稱得上是現時最小、最輕巧的多角度篤芒單反，加上備有黑、紅兩色選擇，男女合用。雖然機身變小，但拍攝續航力卻有所增加，其EN-EL14a電池能拍攝約820張相片，比上代提升近三成，去旅行就唔使帶多舊電咁麻煩。

備有黑、紅兩色機身選擇，黑色為啞面，紅色則是光面。

「指定觸控Fn」功能，可用手指捽芒揀對焦點、調校光圈等設定。

內置Wi-Fi功能

即拍即Share係時下影友嘅基本動作，新機當然備有Wi-Fi功能，用家只要透過《Wireless Mobile Utility》手機App，即可做到遙距拍攝及傳送影像，畀各位分享靚相。規格方面，新機具備2,420萬像素CMOS、39點自動對焦點、5fps連拍速度，還有10種有趣的濾鏡特效如普普風、玩具相機等，而且濾鏡特效仲可加進影片中，能夠拍到1,080@60p全高清影片。

電池備有1,230mAh電量，可影到約820張相。

機頂設有Hotshoe和立體聲收音咪。

模式轉盤把以往的場景模式歸納到SCENE中，操作轉盤亦經過重新設計。

同場加映：新鏡雙雄

除了新一代單反外，廠方同場亦帶來兩支新鏡，包括適用於FX格式的AF-S Nikkor 300mm F4E PF ED VR，作為輕巧定焦長炮，它用上PF（Phase Fresnel）鏡片來縮減體積及提升畫質。另有對應DX格式的AF-S DX Nikkor 55~200mm F4~5.6G ED VR II，用上伸縮鏡筒設計及走親民路線，二千多元有交易。