DJI Vs Parrot航拍空戰
機Gor搭飛機多過搭船，以前試過坐直升機從高空拍攝維港景色，估唔到這股航拍熱潮近年席捲全城，而且唔使親身飛到上天咁麻煩，利用萬元左右嘅飛行攝錄器，已可遙控影低香港美景。
今次機Gor搵嚟人氣航拍機款DJI Phantom 2 Vision+及Parrot Bebop Drone，齊齊飛上天試吓邊隻最好View！
Phantom 2 Vision+ 一體化減震
有留意航拍的話，相信冇乜人唔識DJI呢個牌子，事關早年「三個小生」嘅旅遊節目，就用初代DJI Phantom玩航拍，引起網民熱烈討論。
其實四軸設計嘅Phantom前前後後出過5款型號咁多，部分如Phantom和Phantom 2都可裝上GoPro等Action Cam拍片，至於今次測試嘅Phantom 2 Vision+，本身已內置一體化鏡頭和減震轉軸，新手都啱用。
規格表
拍攝畫質：最高1,920×1,080＠30p（短片）、最高1,400萬像素（相片）
鏡頭視角︰140度
電池容量︰5,200mAh
兼容系統︰iOS、Android
重量︰1,242g
Bebop Drone 型格玩味濃
美國Parrot的產品範疇較廣，除了航拍飛行器外，仲有耳機、機械人等。
當中航拍機款有AR.Drone 2.0、MiniDrone Rolling Spider等，而今次測試的Bebop Drone以實戰玩味為主，仲可配合巨型控制器Skycontroller一齊玩。
其實廠方嘅航拍機主打四軸設計，外形搶眼之餘，仲可以喺空中做到360度翻轉等動作，拍片更覺震撼。
規格表
拍攝畫質：最高1,920×1,080＠30p（短片）、最高1,400萬像素（相片）
鏡頭視角︰180度
電池容量︰1,200mAh
兼容系統︰iOS、Android
重量︰390g
第1回合︰拍攝鬥畫質
Phantom 2 Vision+的鏡頭視角有140度，加上鏡頭可向下擺動90度，拍片範圍相當廣闊。最方便是從機身取下microSD卡便可擷取航拍影像，機Gor試播時發現其影片成像銳利，喺戶外夠光嘅情況下色彩都算鮮艷，而影片及相片檔案均以16:9比例為主。至於Bebop Drone需要經microUSB擷取航拍影像，由於它用上180度魚眼鏡頭，機Gor起初都驚影片會變晒形，但實試下邊位扭曲問題唔算嚴重，畫質細膩之餘，影相時畫面仲會變回4:3比例。
第2回合︰飛行鬥穩定
玩航拍最緊要條片夠定，拍出嚟影像先唔會震到頭暈，當中Phantom 2 Vision+飛到半空時，能夠喺指定位置停留，加上配備三軸減震雲台，就算遇上強風令機身擺動，鏡頭依然可保持水平位置。另一邊廂，雖然Bebop Drone機身都有三軸穩定系統，就算左右移動都能減低畫面震動，不過去到戶外高空拍攝時容易遇上氣流，機身會自動上下浮動變得冇咁穩定。
第3回合︰遙控鬥操作
Phantom 2 Vision+跟機附有遙控器，以RF配對航拍飛行器，接收距離大約800米左右，操作唔算困難，仲可以夾住部電話，利用《DJI Vision》手機App，實時監控鏡頭畫面，只可惜畫面質素偏低，實時取景甚至有少少起格。Bebop Drone則支援巨型嘅Skycontroller遙控器，拎出街雖然有點誇張，但可夾實手機或平板，以《FreeFlight 3》App睇住畫面，玩起來更爽手，佢仲內置Wi-Fi放大器，接收範圍可達2公里咁遠！
達人教路：航拍導師Lock Sir：「減低電波干擾！」
「揀航拍機最好支援GPS和自動返航功能，能夠鎖定喺空中，並自動返回起飛嘅位置，咁就唔怕架機飛得太遠；如果有埋轉軸雲台更添穩定。至於選擇航拍地點都好重要，建議喺遠離發射塔嘅地方，冇咁易受到電波干擾，仲要記得關掉手機Wi-Fi，以免影響接收能力。」
機Gor Report：戶外玩DJI 室內用Parrot
DJI Phantom 2 Vision+及Parrot Bebop Drone均具備GPS系統，同時有返航功能，之不過帶出街玩，機Gor建議選擇前者，Phantom 2 Vision+的機身較大，冇咁易受戶外氣流影響，而且電池有成5,200mAh，充一次電就飛到20~25分鐘。至於Bebop Drone的電池得1,200mAh，大約飛到10分鐘左右，成日要換電都幾冇癮，所以較適合室內玩，而且跟機附有易裝易拆嘅防撞欄，一旦遇上碰撞，螺旋槳便會停止轉動，玩得更加安心。
機Gor
機不離身，不信Spec只信測試，不扮高深，懶理低俗，貪新不忘舊。
撰文：機Gor
查詢電話：（a）3188 0767、（b）2736 1733