SH-01G抓拍王1,310萬像素GR上身

日系手機一向帶領拍攝潮流，千萬像素、高質Sensor、美顏模式等全部由佢哋帶起，不過出咗咁多年，始終欠一份業界肯定。等了又等，終於有呢部DoCoMo SH-01G面世，最大賣點係鏡頭獲得Ricoh GR認證，質素拍得住GR相機，影友一定Like！

售價︰$6,080

繼承GR傳統

若有一定影相年資嘅影友，定必聽過GR相機，昔日呢部Snapshot機王，連Eason、藤原浩等潮流Icon都追捧，擁有一部可說是身份象徵。事隔多年，它於SH-01G上重生，鏡頭畫質達1,310萬像素，並支援F1.9大光圈。試拍所見，相片邊位的變形相當輕微，成像銳利且顏色鮮艷，有GR系列嘅優良傳統。此外，新機支援HQ及NightCatch兩大模式，前者可減低雜訊，後者能增加感光度，加上HDR及4K攝錄，功能齊全。

邊框牙籤咁幼

影相咁靚，屏幕自然要配合得到。SH-01G擁有5.5吋1,920×1,080解像度屏幕，數字上同iPhone 6 Plus相同，但新機嘅長闊只有141×76mm，面積比對手細12%左右，即使女仔單手拎機都冇投訴！另一亮點是採用EDGEST幼邊技術，機身三邊只有牙籤咁幼，令屏幕佔了機面81%咁多，觀感更加震撼。值得留意是三邊邊框還具有發光功能，來電或收到短訊時會有冷光提示，果真是有姿勢有實際。

屏幕佔機面的面積達81%，接近無邊設計。

一體成形機身設計，幸好保留microSD卡槽。

跟熱賣中的5.5吋LG L24（左）比較，SH-01G（右）屏幕亮度較高，顏色亦夠鮮艷。

跟熱賣中的5.5吋LG L24（左）比較，SH-01G（右）屏幕亮度較高，顏色亦夠鮮艷。

對應高清音效

新機雖然內置Qualcomm Snapdragon 801 2.3GHz四核心處理器及2GB RAM，《AnTuTu》跑分有39,937分，接近機王級數，但機價卻要$6,080，感覺始終未夠抵用。幸好，手機對應24-bit 192kHz高清音效解碼，並兼容WAV、FLAC等無損音樂格式，配合dts Sound技術，聽歌質素同大廠旗艦機看齊，加番唔少分數。此外，新機來自日本，防水功能自然唔少得，但亦因為防水而令全機幾乎密封，冇得換電未必個個Buy。