AKA卡通韓Phone創意「顯眼」

以卡通掛帥嘅手機向來深得年輕人喜愛，但想喺機海中突圍而出，單靠卡通人物未必夠。韓廠LG特別創作出AKA系列卡通人物，不僅角色搞鬼得意，手機仲同佢哋襯到絕，除了用上同系配色，還額外附送半截式保護蓋，當套上保護蓋時屏幕便會露出一對眼睛，眼仔睩睩咁轉表情，女士必Like！

機背設有鏡頭、閃光燈及Rear Key背掣。售價：$2,880

四大角色表情十足

AKA系列手機（F520型號）共有粉紅、黃、黑、白4種配色，分別代表YOYO、EGGY、SOUL及WOOKY各主角，跟機嘅半截式保護蓋以及手機背殼都用上同一色系，效果既統一又搶眼。原來呢個半截式保護蓋仲內有乾坤，皆因它植入晶片，當保護蓋套於機面後，手機屏幕便會顯露一對大眼睛，每當用家掃動時眼珠就會四圍郁、遮住屏幕時又會瞇眼、揮動機身仲會暈眩，相當過癮！此外，雙眼會根據用家使用嘅功能而畀不同反應，好似插進耳機時角色會戴上耳筒等。而每位主角都有其專屬來電、通知鈴聲及主題，比一般手機嘅聲效更活潑；只要更換其他保護蓋，以上內容仲會一併更換，夠晒好玩。

DIY保護蓋自行扮靚

為咗方便用家操控，當保護蓋套上手機時，來電、鬧鐘等介面會相應縮小。而半開保護蓋時，畫面會顯示時間、日期及其他通知訊息，非常實用。此外，新機內置「Come in&」專屬程式及Widgets，提供AKA Space、Snapsh-OO-t等功能，前者會連上AKA官網，可下載Wallpaper、參與Instagram活動等；後者則可透過附送的實體公仔AR互動拍攝，又或者將虛擬的AKA公仔加進實景之中。廠商仲鼓勵用家幫保護蓋搞花臣，原裝附送多款AKA貼紙，亦經常喺官網舉行手機設計活動，有藝術和繪畫天分嘅朋友不妨一玩。

半滑保護蓋時會顯示時間、通知提示等，仲識變換Wallpaper。

連包裝盒都採用特別設計，外層印上AKA角色嘅大眼，內層有立體卡通人物。

效能中上背掣設計

想全屏幕使用手機時，用家可將保護蓋拆下來套於機背。其實新機的設計及定位有啲似同廠中階機G3 Beat，採用Qualcomm 1.2GHz四核心處理器及5吋屏幕，配合1.5GB RAM及16GB內存，效能屬中上水平。當然唔少得Rear Key背掣設計，新機將音量掣及開關掣擺晒喺機背，長按音量掣更可快速開啟QMemo+及相機功能，方便單手操作。軟件方面，新機預載Android 4.4作業系統及自家介面，操作體驗與同廠手機分別不大，睇片玩Apps亦見流暢，最特別係加入AKA卡通主題，感覺更年輕。