100億種砌法!Gundam Breaker 2模型大戰

俗語話「男人愛高達,女人唔明白。」砌模型可說是男人的浪漫,但買到一屋都係Gunpla,老婆唔投訴,屋企都冇位擺。不如試吓剛推出嘅《Gundam Breaker 2》,皆因遊戲結合模型組裝和動作格鬥元素,提供超過100款模型任砌,若果將所有高達拆散Mix & Match,足足有逾100億種砌法,加埋塗裝、貼紙、舊化等微調,人人都可變成模型大師!

人氣機體加入戰陣

上集《Gundam Breaker》推出時,食正高達模型對戰動畫《Gundam Build Fighters》播映,帶挈遊戲嘅人氣銷量俱增。今次廠方照辦煮碗,10月播放第2季動畫《Gundam Build Fighters Try》,遊戲續作隨之12月賣街。比較起來,新作收錄超過100款HG 1:144及MG 1:100模型,部分人氣機體如Gundam Ez-8、Rozen Zulu等加入戰陣,亦增設單機劇情提升耐玩性。為承接動畫熱潮,開發商更於初回特典附上第2季主角小隊之3款機體,包括Build Burning Gundam、Powered GM Cardigan和Lightning Gundam,讓玩家搶先試「砌」。

新增零件進化系統

玩法方面,機體操作與上集冇乜分別,都係一堆高達模型大混戰,當打爆敵機時會有撞散模型效果,以便收集組件自砌機體。指定關卡除咗要同1:60巨型Perfect Grade頭目肉搏之外,更加入大型MA及戰艦挑機。不過狂刷關卡打組件,玩得多都會悶,所以新作追加零件進化系統,於戰鬥時部分目標會顯示不同強度的PE膠接駁圈,收集後便可用來強化素材。而舊玩家仲可將Save檔直接過落新作,惟特殊塗裝、舊化等效果會統統消失,玩家要花時間再搞過。

武器特性更講究

新作嘅賣點係「超絕進化」,不僅增加登場模型數量及零件進化系統,連模型手上的武器都可自己炮製,而且不同武器的特性和威力各有分別,配合4人連線作戰,玩法更具鑽研性,如火箭炮屬於後方支援武器,可在一定範圍內將敵人擊飛,好讓前線機體乘勢衝前肉搏;又如水中機體龜霸可利用近身武器鈎爪,抓緊敵人進行投擲。遊戲提供約20款武裝類別,要練熟全部用法都很花時間呢!

DETAILS

類型:動作

發行:Bandai Namco Games

平台:PS3、PS Vita

人數:1人(支援4人連線)

售價:7,600日圓(PS3)、6,640日圓(PS Vita)

查詢電話:2782 0978

撰文:廖俊斌