2014年快將完結，今年社會有唔少大事發生，迅即成為網民茶餘飯後嘅熱話，更衍生出不少潮語。就好像這句「講呢啲，厚多士乜乜乜！」很多人聽到都一頭霧水，其實它包含了幾組潮語在內。適逢Yahoo!、Google、YouTube等剛公布今年人氣搜尋排行榜，一於請專家歸納出潮語Top 3，並為各位分析其背後意義。可能下一個潮語很快便會彈出，只要肯追肯學就人人都識玩！

街上遇到不平事，好多人都唔會出聲，取而代之係拎起手機拍片，下一步就係「YouTube見」；不過喺眾多「紀錄片」當中，「厚多士」可算2014年回響最大，短片於YouTube錄得超過68萬次觀看，更成為YouTube 2014年度香港熱門時事影片排行榜第5位，網民創作嘅相關Remix短片都有逾50萬次觀看，Hit到當時連茶餐廳都加推厚多士套餐，足證玩味十足！

此潮語源自YouTube 5月的短片，有乘客拍到講廣東話唔正嘅女人大鬧港鐵車廂，不段重複講「你好多事」，可惜因發音不正成為「你厚多士」。香港中文大學中文系講師歐陽偉豪博士分析：「大家用咗一啲易於理解、有雙重意思嘅字，去模擬佢唔純正嘅廣東話玩語言攻擊，俗語就係『抽水』。其實好多人講非母語都會帶有口音，不過好少成為笑柄，而『厚多士』被狂玩，反映出中港矛盾愈來愈嚴重。」難怪它同時於Yahoo!香港2014潮語排行榜獲得第2位！

專欄作家健吾亦認為潮語是反映當時社會所關注嘅事件。「依家網絡對潮語嘅影響，比起電視更加大，經過facebook散播、YouTube瘋傳後，一般網民難以避開唔接觸。而網民以『厚多士』為主題製作嘅圖輯、短片，亦唔算係惡搞，反而幾有幽默感，可算是網絡嘅民主生態。」

改圖文化呢幾年愈玩愈多，除咗考網民《Photoshop》技巧，最關鍵都係創意。而今年嘅「萬能Key」之首一定係劉江嘅「講呢啲」，它於不少潮語排行榜都打入三甲位置。其實原圖是來自網上討論區，雖是擷取自電視劇集，但實際字幕並非「講呢啲」，純屬改圖。但精妙在無論表情和語句都出奇地配合，更一度成為唔少人嘅口頭嬋。次文化堂社長彭志銘認為：「呢句說話帶有無奈、無力嘅感覺，當遇上唔想講或者唔想多解釋嘅時候，某程度上可透過『講呢啲』來抒發，成為另一種方式的生活宣洩。」

「榴槤乜乜乜」雖是近兩個月才興起，但在Yahoo!香港2014潮語排行榜位列No.1。話說佔中時有內地男子持刀四處拆路障，但接受電視訪問時卻指自己持刀是因為鍾意食生果「榴槤乜乜乜」，無稽之言遂成網民恥笑對象。歐陽偉豪認為「榴槤乜乜乜」背後代表着中港矛盾以及盛載內地人的粗魯行為，被廣傳的原因是句式具相當彈性，較易被人二次創作。次文化堂社長彭志銘指出：「潮語同社會息息相關，是以近半年來潮語大多與佔中有關，不過每個潮語都有其生命力，有機會隨時間失效，要視乎新一浪潮語嘅威力夠唔夠大。」

另一網上討論區創作的潮語「HeHe」，睇落同笑聲相近，但正解是將HeHe拆成兩個He字，代表男同性戀者。其實此字起初冇咁多人留意，但因為早前學聯岑敖暉及周永康被網民塑造成「男神」形象，於是借助外來語以隱晦方式去形容兩男嘅關係，令到事情疑幻似真。

潮語即年輕人的潮流用語，近年多透過網絡流傳。不過早於互聯網興起前，已有「屈機」、「Yo使乜驚呀」等常用詞彙，以屈機為例，原指打機時對手太強的意思，後引伸至日常生活無力招架。及後互聯網流行，更出現大量網絡詞彙如Orz（跪下沮喪動作）、十卜（Support支持）等。而外國亦不乏潮語，當中Selfie（自拍）更成為2013年度牛津字典風雲字！

踏入2014年底，各大網站均公布了搜尋排行榜，以Google為例，香港熱門關鍵字的首位是掀起一陣追劇潮、剛於11月開台的HKTV，第2位是炒風延續至今的iPhone 6，第3位是令全民通宵捱夜睇的世界盃，均屬大路結果。另外，較有趣的排名榜有流動裝置搜尋排行榜，首位不出所料是iPhone 6，而第2至4位分別是LG G3、Nexus 6及紅米手機，反而另一大牌Samsung GALAXY Note 4只獲第5位。值得一提，YouTube 2014年度香港熱門原創影片排行榜中，大部分均以搞笑方式諷刺社會現象，包括首位《FHproduction我在香港讀書的日子上集》等，令不少網絡作者爆紅。

1.HKTV

2.iPhone 6

3.世界盃

4.馬航

5.使徒行者

1.榴槤乜乜乜

2.厚多士

3.講呢啲

4.倒抽一口涼氣

5.心入面條蟲

1.一口涼氣 - JFung Remix

2.那夜凌晨，我坐上了大埔開往旺角的GoGoVan

3.《叛逃》玩跳樓 關禮傑 Vs 陳展鵬

4.（公屋潮文）公屋●居屋●私樓

5.教你八千月薪如何買林寶堅尼

撰文：林子聰　

部分相片：互聯網及資料圖片