564ppi靚芒睇片F-02G亮麗聖誕

「又到聖誕，又到聖誕。」食大餐、睇燈飾其實只係配菜，主菜係趁機買番份禮物，氹吓自己同身邊嘅人。一眾品牌當然盡情吸金，紛紛推出新作，好似剛登場嘅冬季旗艦機DoCoMo F-02G，不但備有5.2吋2K靚芒，屏幕像素密度仲高達564ppi，畫質極盡細緻，仲有埋杜比音效、2,070萬像素鏡頭，擺明畀各位用嚟煲劇和影燈飾，過一個「亮」麗聖誕！

售價：$6,280

屏幕顏色自然

每逢聖誕前夕，facebook、Instagram例必有大量聖誕靚相，手機有個靚芒先可以將佢哋原汁原味呈現。F-02G備有5.2吋564ppi像素密度屏幕，比同樣玩靚芒、401ppi嘅iPhone 6 Plus仲要高，廠商話佢嘅像素密度係5吋以上Smartphone中最高。小記試玩咗幾天，發覺喺近距離下完全睇唔到屏幕嘅Pixel，而且Super Clear Panel顏色自然，可視角度和亮度夠高，睇片光暗位層次分明，顯示效果超靚。加上前置喇叭支援杜比音效，環繞聲清晰之餘，音量輸出夠大，用嚟睇片一流。

八角外形勁Raw

八角形機身設計的F-02G，背面加入防滑物料及指紋辨識器，另支援日系機常見嘅IPX5/IPX8標準，喺1.5米水深可正常使用30分鐘，感覺勁Raw。最過癮係新機兼容「風呂防水」，喺高濕度及高溫環境都頂得住，天寒地凍去浸溫泉都可以帶埋佢。此外，機身棱角設計令手持時更穩陣，美中不足是它厚達9.4mm及重166g，比其他玩輕鬥薄嘅新機輸蝕咗啲。

內置Slide Display，畫面可即時向下移，單手操控冇問題。

2,070萬像素鏡頭下方設有指紋辨識器，手指一掃即可解鎖。

機身採用八角形設計，支援IPX5/IPX8防水標準。

雙軌極速下載

拍攝功能方面，新機備有2,070萬像素鏡頭兼採用Exmor RS for mobile感光元件，內置連拍、Panorama、HDR等功能，亦可於拍攝後加入濾鏡特效。小記試拍聖誕裝飾時，相片成像銳利，惟對焦反應唔算快，希望日後軟件更新會有所改善。其他硬件則採用Snapdragon 801 2.3GHz四核心處理器、3GB RAM等旗艦規格，配合Android 4.4作業系統及DoCoMo LIVE UX介面，操作極之流暢，撥頁、開Apps反應靈敏。值得一提，新機內置多項實用功能，包括Slide Display及Multi-Connection，前者於虛擬功能欄新增箭嘴掣，一按畫面便會縮細兼向下移動，單手篤芒更就手；後者則可同時連接Wi-Fi及LTE網絡，令下載速度大幅提升，小記試過輕鬆達40Mbps，串流睇片勁爽！