Z3 Tablet Compact連動PS4新板斧

阿媽要煲電視劇，阿仔又想打PS4，「爭電視」情況時有發生。想解決此問題，原來有部Sony新推出嘅Xperia Z3 Tablet Compact就搞得掂！它屬首款平板支援PS4 Remote Play功能，可將PS4畫面無線同步至8吋屏幕，夾埋個DUALSHOCK 4手掣便可打機，瞓喺床都可喪煲《NBA 2K15》等大作！

售價：$3,498（Wi-Fi版）、$4,298（4G版）（不連手掣）

無線玩PS4

不少機迷屋企都有部PS4，傳統會接駁大電視打機，不過遇着屋企人想睇電視就焗住冇得玩。Z3 Tablet Compact的PS4 Remote Play功能便為此而生，用家只要將屋企部PS4與它連接於同一Wi-Fi網絡，再登入Sony Entertainment Network帳戶，遊戲機嘅畫面便會同步至平板上。小記現場測試時，設定過程1分鐘搞掂，喺平板上玩PS4遊戲完全冇窒機，8吋1,920×1,200解像度屏幕的畫質亦算細緻。最正係除咗可透過虛擬按鍵操控外，仲可無線連接DUALSHOCK 4手掣，若加埋另購的GCM10遊戲架，仲可將平板及手掣扣埋一齊！

270g輕巧機身

要方便打機，機身當然唔可以太累贅，新機雖然有8吋巨芒，但竟然輕至270g，厚度更只有6.4mm，比Size接近嘅iPad mini 3（331g）仲要輕，便攜性極高。唯一要扣分係屏幕兩邊嘅邊框稍粗，單手拎機有啲辛苦。外形則頗有同廠Xperia Z3風格，機面備有雙喇叭，側邊嘅開關鍵亦用上招牌銀色圓形按鈕；稍有不同是機背由強化玻璃換上磨沙塑膠物料，跣手機會大減。值得一提是它支援IP65/68防水防塵標準，喺浴室沖住涼都可照常操作。

機身備有8吋全高清屏幕，顯示細緻，可視角度不俗。

支援IP65/68防水防塵標準，沖涼睇片都冇問題。

用家可另購GCM10遊戲架，將平板電腦和DUALSHOCK 4手掣扣實。售價：待定

用家可另購GCM10遊戲架，將平板電腦和DUALSHOCK 4手掣扣實。售價：待定

高階硬件規格

規格方面，新機搭載Qualcomm Snapdragon 801 2.5GHz四核心處理器及3GB RAM，同時支援microSD插卡，效能及擴充性不俗。另內置4,500mAh大電池，廠方表示播片續航力可達15小時，理論上玩足一天都冇問題。此外，新機備有810萬像素鏡頭，影相質素不俗之餘，亦預載多款拍攝模式，包括將虛擬卡通公仔加入實景嘅「AR效果」、連接指定裝置玩分鏡效果嘅「多相機」等，非常好玩！還提供Wi-Fi及4G兩個版本，後者更兼備通話功能，惟機身不設聽筒，通話時建議帶定個免提裝置。