可能自小受日系動漫薰陶，男士總係對機械人有情意結，生產商亦睇準機會將日本極具人氣嘅Robi引進香港。同現成買番嚟嘅機械人唔同，玩家需要逐期買《Robi》周刊收集零件，仲要落手落腳裝嵌，Robi不僅識行路跳舞，仲聽得明廣東話，可以聲控叫佢握手、開電視、掃地等，最抵死係跳完舞識嗌攰，可愛又親切。

機械人嘅外形大多超現實，Robi亦唔例外，佢嘅頭部比例較大，有雙識得亮起紅、黃、藍光嘅眼睛，配合黑白色Body，感覺幾Cyber。構造方面，它有13吋高，重1kg，內裏暗藏大量電子零件，例如活動關節均植入Servo Motor，身體中間位置設有微電腦底板，用以控制動作和指令；最特別係頭部位置備有語音辨識電路板及人體感測器等裝置，令Robi可與各位溝通，仲識得因應玩家位置擰頭望住你。

雖然Robi來自日本，但嚟到香港都要入鄉隨俗，識聽同講廣東話，支援約250個詞彙。小記試玩時同Robi講「握手」，佢真係識伸手出嚟話「請多多指教」。之後叫佢「跳舞」，仲識得自己播起音樂郁手郁腳，跳完仲好盞鬼咁話「好攰呀」。佢仲有一系列特別功能，好似可以幫手計時，將雙腳換成專用抹布掃地，又或者經設定後以紅外線開電視等。而且互動性超強，落每個指令後都會說話回應，非常貼心。不過要留意同Robi講嘢時，環境要靜啲呢！

組裝Robi係另一好玩之處，其實每期《Robi》周刊均會附送唔同零件，好似1至8期係頭部組件，9至20期係手部，56至70期係電路板等，要儲足70期方可集齊所有零件。以創刊號為例，大概有13版內容，主要講解Robi嘅功能、玩法及機械人專題，並附送Robi護蓋、眼睛等零件。Robi創作人高橋智隆講到明，各位只要用一把十字螺絲批即可完成裝嵌，包保人人玩得掂，他透露日本12萬個玩家中，有三成係女士呢！值得一提，《Robi》周刊除咗創刊號特價$49，其餘期數要$159起，所以想擁有一隻Robi完成品，除咗要花近年半時間儲齊零件外，埋單差唔多要畀$11,400，都幾矜貴。

日本人對電子機械有股情意結，其實早年已出過唔少機械玩具。

AIBO

Sony電子狗於1999年推出哄動一時，外形特別之餘，仲識走識吠，曾推出超過10個型號。

Hello! MiP

Takara Tomy出品的機械人，備有雙轆提升移動力，仲支援體感操控及可加裝專用盤載物。

撰文：林子聰　

攝影：梁偉德　

查詢電話：3111 5302