Xbox One港版駕到！飆車過戲癮

《Forza Horizon 2》逼真碰撞

為配合Xbox One行貨發售，有廿多款遊戲同步護航推出，粉絲想先玩邊隻Game都有排揀。焦點之一當然係《FIFA 15》，今集球員動作做得更寫實，運球、射門等操控也極具鑽研性，最有趣係加入「生動旁述」，十足桂神講波咁有Feel，令投入感大增。至於10月2日開賣嘅賽車遊戲《Forza Horizon 2》亦值得推薦，新作透過Forza畫面引擎，令賽道天氣演變、沿途景致、車輛逼真度等大幅提升，而賽車碰撞的物理效果也做到似模似樣，仲收錄歐洲南部逾700條賽道，可隨時片落田園，又能跟火車鬥快，配合超過200款戰車畀大家選擇，展現個人飆車風格。

手勢操控煲劇

港版主機另一獨家功能，是於Xbox LIVE平台推出專屬《MyTV》程式，毋須切換頻道便可直接於主機串流3條免費直播Channels，仲支援1,080p全高清顯示，而且透過Xbox LIVE的穩定連線，唔怕睇電視時窒格Delay。

發布會示範如何在Xbox LIVE介面，利用Sidebar邊玩遊戲邊煲劇。	排長龍獲得主機嘅首位買家Jetco，話會返屋企立即煲《FIFA 15》。	廠方開賣派對中，利用3D Mapping技術投影出立體主機及遊戲畫面。

就算玩遊戲時等緊人上網挑戰，都可以利用Snap功能拉出Sidebar邊打機邊煲劇，廠方稱可藉着Xbox SmartGlass以手機或平板當成Remote操控程式，甚至可利用Kinect以體感手勢啟動程式，極之方便。

另一大作《Sunset Overdrive》的角色有多個搞鬼造型，睇吓Model扮得幾似！	勁Games必玩推介 《FIFA 15》年度大作 今集進一步展現更細膩逼真的球員動作，並加入「生動旁述」功能，十足現場睇波一樣。售價：$449	《Forza Horizon 2》飆車狂熱 透過Forza畫面引擎，重現真實的車輛碰撞效果，連路面狀況、天氣變化的轉變都細緻呈現。售價：$419

（Xbox One《FIFA 15》同綑裝）售價：$3,380、（Xbox One連Kinect《FIFA 15》同綑裝）$4,180

《Killer Instinct: Combo Breaker Pack》奇幻格鬥 原為獨佔下載遊戲，北歐奇幻格鬥玩法備受追捧，故輯錄成遊戲光碟版，收錄第一季登場角色並附送格鬥家TJ Combo。售價：$269	猿顏迷彩主機 為慶祝港版主機開賣，廠方特意跟潮牌Aape合作推出「猿顏迷彩別注版」非賣品主機，將由即日起至10月5日於apm展出。	5.1音響睇戲 英國音響品牌KEF為Xbox One而炮製，圓拱形設計的E305 5.1聲道喇叭套裝，將連同Xbox One連Kinect套裝及Marantz擴音機NR1605一併發售，售價為$17,800。

撰文：廖俊斌

攝影：胡振文

查詢電話：3071 4868