MX4美顏搶分

國產手機熱爆全球，龍頭Huawei、ZTE、Lenovo做得好之餘，後起之秀小米一樣大賣，反而起步更早嘅Meizu（魅族）好似冇乜聲氣。日前廠方終於出手反擊，喺北京國家體育館發布MX4旗艦手機，航空鋁邊框固然搶鏡，還用上超強八核處理器，性能比上代MX3激增87%，Benchmark得分驕人；仲備有2,070萬像素鏡頭及實時美顏功能。最吸引係入手價只需1,799人仔，難怪在場「魅友」個個都爭住預定！

屏幕邊位僅有2.6mm，幾乎用盡兩邊空間。

航空鋁邊框

發布會前廠方已廣發邀請卡畀各地傳媒，邀請卡以鋁合金製成砌圖形狀，設計有心思之餘，原來呢個正正係MX4賣點之一。其邊框以航空鋁金屬，配合CNC工藝切割，令屏幕邊位只得2.6mm，用家手持5.36吋大芒更輕鬆。外形唯一要扣分係新鮮感，直板圓角機身以至機面圓形按鍵，設計同MX3甚至前代MX2有八成相似；幸好新機除咗灰、白色外，仲追加大熱嘅金色。而以往幾代魅族手機嘅背蓋都勁難開，嚟到MX4終於冇咁麻煩，蓋邊設有凹位一揭即開，換SIM卡從此更爽手。

性能強87%

規格方面，新機改用MediaTek 6595八核心處理器，由4枚A17 2.2GHz及4枚A7 1.7GHz核心組成，廠方話性能比上代勁87%，以《AnTuTu》跑分高達46,124分，比不少大廠旗艦機仲要強！操作順暢，上網要夠快先配合到，故新機植入5模13頻，不論香港抑或內地嘅2G、3G及4G網絡都兼容到，其中香港啱用嘅FDD-LTE可玩埋Cat 4制式，下載速度高達150Mbps，串流高清片都唔會Lag！

機背用上塑膠物料，幸好加入磨沙處理，唔易黐上指紋。

拍埋上代MX3（左），MX4（右）屏幕大少少，但新鮮感要扣分。

拍攝更靈活

近期唔少手機都以影相做賣點，MX4亦唔例外。鏡頭由上代800萬像素大幅提升至2,070萬像素，配合1/2.3吋CMOS感光元件，輔以雙色LED閃光燈，令人像膚色可保持自然。值得一提是它新增每秒25張連拍、720p慢動作錄影，以及30fps 4K攝錄等功能，另支援實時美顏，鏡頭會自動辨識主體，並提供十級美瞳、瘦面、磨皮、美白等效果，相信可吸引唔少女士使用。新機用上平面化圖示嘅Flyme 4介面，新中文字款顯示更清晰，最實用係有「安全中心」及「語音助理」，前者內置垃圾清理、病毒查殺、流量管理等，管理系統更Easy；後者則似足Siri，以普通話即可控制手機進行撥號、短訊等功能。