大師四式潮拍 Phone騷寫真
書展將於下周開鑼，又係o靚模「胸」群而出推寫真嘅時候，不過與其得個睇字，有冇諗過出手影番輯靚相呢？其實想自製寫真，毋須出動單反咁大陣仗，用智能手機一樣掂。今次便請來影女無數嘅司徒夾帶（學鳴），聯同快將推出寫真集嘅趙詠瑤（Kimi），為大家傳授手機速拍寫真秘技！
第一式：高抄加美顏
攝影界有句名言︰「你影得唔夠好，係因為你唔夠近。」人像攝影亦然，司徒夾帶解釋︰「影Model首要學影大頭相，範圍大約由頭至腰，主要是用來捕捉對方表情。建議用高抄拍攝，可令Model眼睛顯得較大、下巴較尖，看起來更可愛。而近攝有機會暴露肌膚瑕疵，所以盡可能開啟美肌模式，縮短後期製作時間。」例如他利用新到港嘅Samsung GALAXY S5 LTE-A拍攝，以1,600萬像素鏡頭加上五級美肌模式，配合0.3秒極速對焦，Model任何表情都能瞬間捕捉！
第二式：拍動感一面
影Model其中一個常用方法，是藉着大光圈，以淺景深來凸顯人像立體感。「香港環境大多雜亂，若入埋鏡容易造成干擾，淺景深的好處是可模糊化背景，同時令畫面更添詩意。」司徒夾帶強調，有時Model的一些不經意行為，例如潑水、玩沙等，既能呈現可愛一面，也能強化畫面生命力，拍攝時不妨多作捕捉。Sony Xperia Z2提供「背景散焦」功能，可模糊背景營造出淺景深效果；另支援Timeshift Burst，可從連拍中找出最好的一張，拍攝動感相片就最無敵！
第三式：巧妙用逆光
「近排天氣咁好，冇理由唔影吓逆光吧！所謂逆光拍攝，即係吼準陽光45度斜斜哋射落個人度，Model背光面向鏡頭，然後再開埋手機嘅HDR模式，令反差冇咁大，突出頭髮、臉部輪廓之餘，塊臉又唔會黑晒，勁有Feel！」司徒夾帶補充，背光拍攝不妨多用仰角，這樣可使Model身材看起來修長一點，同時可納入更多景物，豐富畫面。CAT B15三防手機內置HDR模式，外部仲用了銀色陽極氧化鋁及減震橡膠包裹，防撞兼防刮，插落沙低抄拍攝都唔怕傷到機身。
第四式：三分構圖法
司徒夾帶教路，新手影Model不妨多用三分構圖法，「方法係取景時畫個『井』字，將Model放喺4個黃金交叉點嘅任何一點，讓主體與景物互相呼應，並同時拍出前、中、後景物。想玩嘢啲可把Model放喺畫面邊緣，這樣做不但可營造出空間感，還方便日後把相片製成Wallpaper送畀人。」
聽落有點複雜，幸好新抵港水貨機DoCoMo SH-04F預載Framing Adviser，可於取景時顯示出不同分隔線，用戶只要把人像放於構圖交叉點上，便能拍出完美靚相。
司徒夾帶大師要訣
1.陽光是手機屏幕的大敵，建議把亮度推至最光，以減低取景時的反光程度。
2.手機鏡頭最好有500萬像素以上，以應付日後沖曬相片所需。
3.拍攝前不妨與Model互相拍照，藉此減低對方緊張感，動人甫士往往是最放鬆時才捕捉得到。
手機拍攝道具
司徒夾帶於拍攝時再三強調，手機攝影絕不可偷懶，有時一些小道具，往往可令相片質素大幅提升，以下為常用工具︰
反光板
反光板效果有三，一是將光線反射到Model身上，令主體更突出；二是讓兩眼發亮，使Model看上去更有神；最後反光板亦可起遮光擋雨作用，戶外拍攝必備。
自拍神「棍」
潮流興Selfie，有時影一些自拍照放落寫真，更能豐富內容。若有此需要，自拍神「棍」便大派用場，它除了可增加取景靈活性外，還能延長拍攝距離，同姊妹嚟個大合照都掂！
Kimi寫真 書展推出
有嫩版謝安琪之稱嘅趙詠瑤（Kimi），今年將會喺書展推出《Remember Mi》寫真集，$68一套3本，包含多款Bikini、內衣及性感服飾，粉絲們記得入場到1A B27攤位購買！
撰文︰陳志滔
攝影︰謝孝祥
模特兒︰趙詠瑤（Kimi）
查詢電話：（a）2374 0618、（b）8203 8863（c）8118 0800、（d）2838 9601