這是近來問得最多，以及聽得最多的話。這問題的答案，正正反映出這個社會的眾生相。
如果對方的答案是「有」的話，恭喜你，跟着的對話，當然是環繞着當日的球賽和賽果，無論是彈是讚，最緊要大家「啱Channel」。
可是，若果對方說「冇」的話，場面可能會相當尷尬，甚至難堪。
最常遇到的「酸溜溜型」：「梗係冇啦，第日唔使返工呀？」「覺都唔得閒瞓，仲邊得閒睇波？」
如果你還不識趣，繼續說：「嘩， 擒晚幾精彩呀……」你將會得到對方的黑面或揶揄：「你就好啦，仲有時間睇波！」甚至怒罵：「再講反面！」
因為在不能看球賽的人眼中，睇波就是罪，全世界的人應該陪他一起「受罰」，其心態與「買不到樓」的港人大同小異。
另一類是「我行我素型」，你客氣地問他：「擒晚有冇睇波？」他會極不屑地回答一句：「冇，最憎睇波！」
然後他會用一千個理由告訴你，為何他會如此憎恨足球，說穿了，其實他最想表達的是：我是一個超凡脫俗，最討厭那些人人都做、人人都討論的事情。
還有一類是「上綱上線型」，他不看世界盃的原因是：「最憎嗰個台！」「要畀錢我死都唔睇！」「個社會咁嘅狀態，仲邊有心情睇？」「依家啲波咁假」……然後他們會將話題帶至經濟民生、社會哲學、賭博理論等議題。
近日， 由於碰壁次數極多，筆者已不敢再以「擒晚有冇睇波？」作為開場白。
看世界盃原本是賞心樂事， 何解要談得戰戰兢兢？香港的風氣，真可怕。
網址：www.facebook.com/newpapaclub