槳聲四起話龍舟

採訪當日雖然落住大雨，但見一班又一班男女齊集赤柱正灘，抖擻精神練習扒龍舟，迎接將於端午舉行的龍舟競賽！其實扒龍舟絕對唔難，在國際二級教練兼赤柱龍舟錦標賽籌委會主席王錦泉指導下，初接觸嘅小記與模特兒已玩得有板有眼；而且扒龍舟可練出團體合作精神，大家同朋友聯誼時可以諗諗佢喎。

全身力量都要用

好多人以為扒龍舟同划獨木舟相似，王教練卻指出兩者用力方法稍有不同：「划獨木舟着重上身力量，扒龍舟就全身力量都要用。」所以落艇練習前要做足熱身，如膊頭、手腕、頸、腰及大腿各部分要先運動一下。現時龍舟多以玻璃纖維製造，輕身之餘又夠穩定，相比之下龍舟槳有較多選擇。王教練指出：「新式碳纖槳較輕身，於國際賽常見，惟價錢過千元一支；傳統木槳雖然較重，但百多元有交易，為公平起見，本地賽事只可用傳統木槳。而兩者中間還有合成木槳，由楓木等多種木材製成，會較傳統木槳輕身。」

45度角划入水

王教練表示，想扒龍舟划得快，落槳時要將整塊槳面插入水中，最佳入水角度是由前45度划到後45度，如果能做到每分鐘80槳就最理想；而初學者可由淺入深，試吓1秒1槳便可以。現時香港多數玩標準龍（中龍），未計鼓手及舵手可坐20人，通常會安排較有節奏感、較穩定的隊員坐於前方，令其他隊員能根據其節奏划水。另外由於龍舟內左右座位相等，隊內未必會有相等數量慣用左手及右手的隊員，所以只要習慣座位及用力就無問題。

鼓手通常由女生擔任，既可為隊友畀拍子，亦令比賽生色不少。

採訪當日不時下大雨，但一樣有好多團隊前來練龍舟。

由左起分別是傳統木槳、碳纖槳及合成木槳，重量不同，價錢亦有差異。

引入5人龍舟

除了一班落力划槳的健兒外，舵手位置亦相當重要，能否令龍舟以直線最省力地衝過終點就靠佢。王教練指，一般會由教練或具經驗者擔當舵手。他補充：「現時唔少公司會組隊練習龍舟，一方面可作Team Building，另一方面可當做運動。只要經教練簡單講解及指導，其實好易上手。」但要集齊20個人一齊玩都唔易，故現時有所謂半中龍玩法，即由10人划中龍。另外亦計劃於今年稍後時間引入5人龍舟，玩法跟一般龍舟不同，健兒需要左右落槳。由於所需人數較少，故更啱香港人玩。