朋友M把工作完成，然後準備與太太起程到美國，參加兒子在麻省理工的畢業禮。
我說：「恭喜恭喜，你應該老懷安慰啦。」他說：「都係咁啦。」我說：「阿仔打算點？返香港定留喺美國？」他說：「佢話想讀上去。」我說：「咁上進，咪好囉。」他說：「學費貴到嘔。」我說：「你大把啦，講呢啲。」他說：「前日同佢傾電話，佢係咁話嗰邊讀書好辛苦，我話你依家知道讀書辛苦啦咩？鬼叫你以前唔勤力呀。」我說：「佢唔係不嬲都勤力咩？唔勤力點考上MIT？」他說：「佢一早勤力嘅話，就入咗港大啦！」我說：「……」
考不上港大，所以考入MIT？這是甚麼邏輯？
朋友M解釋，他的兒子在香港一直無心向學，考試成績欠佳，香港沒有大學收容，剛巧參加了交換生計劃，便到美國打個白鴿轉。「估唔到。」朋友M說：「三個月之後，佢已經唔同晒，性格變得好獨立，講句嘢都同以前好唔同。」毋須大人催促，自行在當地找Community College，然後自動參加各類考試，輾轉打開了麻省理工的大門。
我說：「我以為你早就安排佢贏在起跑線，自細打通佢任督二脈，再加上各種私人補習。」他說：「統統都冇。」我說：「佢自己開竅？」他說：「……」朋友M不了解當中的玄機，也不知道畢業禮有何厲害，「我淨係想順便去尼亞加拉大瀑布影靚相。」
網址：www.chan-wai.com