α7S高感光無反染指4K

相機拍4K時代正式來臨！繼早前Panasonic推出首部支援4K拍片的無反相機後，Sony亦不甘後人，剛發布可攝錄4K影片的α7S全片幅無反。各位可能奇怪，新機為何在α7後加個「S」呢？原來它解作「Sensitivity」，感光度高達ISO 409,600，就算環境幾暗都影到靚相，雖然廠方尚未公布定價，但以α7系列嘅高格調，依家儲定銀彈差唔多啦！

背面用上3吋翻芒設計，能夠上下翻揭方便取景。

加記錄裝置拍4K

4K拍片係未來大趨勢，故Sony以針對拍片的α7S打頭陣，讓無反相機都可攝錄3,840×2,160超高解像度影片。之但係用家拍攝4K時，必須利用HDMI外接Atomos Shogun等第三方記錄裝置，事關機身唔可以將海量Size嘅4K片儲存入記憶卡，簡單來說，想拍4K片就要插多舊嘢。新機亦針對全高清影片加入XAVC S格式，優點是無論選用任何幀率，都能以50Mbps比特率壓縮記錄，而且XAVC S格式能以120fps錄製標清片，然後作5倍慢速播放，用來拍動作片玩Slow Motion一流。

1,300%動態範圍

新機不僅於格式和質素落足工夫，仲加入唔少專業拍片功能，例如能自訂Picture Profile，用家可於攝錄前自訂伽瑪、色彩模式、膝點（Knee）等參數，拍出個人風格；還內置S-Log2伽瑪提升暗位細節，以低色彩對比擴大動態範圍至1,300%，藉着高動態範圍令後期製作更具彈性。作為旗艦級機款，新機當然具備Wi-Fi和NFC功能，只要以對應的手機一嘟手柄NFC晶片即可連線，再經《PlayMemories Mobile》App便可遙控拍攝及過相，即拍即Share冇難度。

售價：待定

採用1,080mAh鋰電池，可拍攝約380張相片或60分鐘影片。

畫質順滑流暢

α7系列中的α7和α7R以高像素見稱，而α7S明顯以拍片優先，所以只有1,220萬像素，但藉着Full Frame大Sensor強化集光能力，特別提供ISO 409,600超高感光度。廠方於發布會示範以高感光度拍攝，畫面冇明顯Color Noise，及後小記調至ISO 6,400試拍，仍感順滑流暢，無論對影相或拍片都有莫大幫助。外觀方面，它採用全黑機身加橙色接環，「S」字更採用藍色字款，配以機背3吋翻揭式屏幕，有助高低角度取景，而機頂Hotshoe不僅可外加閃光燈，更可另配XLR-K1M專業收音咪等，擴充能力不俗。