太平清醮 食買玩大包圍

「食」3種口味包包

傳統祭祀用的包山塔，塔身的平安包主要由長洲兩間餅店負責，其中一間為開業近40年、位於北社街的郭錦記餅店。佢哋每年賣包都賣到大排長龍，店舖負責人郭錦華憶述：「其實以前未有平安包之前，我哋稱之為包山包，而包上會印有『壽』字，自2005年復辦搶包山活動，先至由『壽』字改為『平安』二字，寓意平平安安。」他續稱：「傳統平安包只有麻蓉口味，後來為滿足市民需要，先至加入蓮蓉和豆沙口味。至於包嘅表皮係由沙糖、酵母、泡打粉和麵粉製作，最後將花紅粉開滾水，喺蒸熟咗嘅包上以木印印上『平安』二字便完成，加上所有包即做即賣，全無添加劑或防腐劑，所以各位可放心食用。」由於現時主要以機器代替人手製作，故太平清醮當日可以生產近萬個包應市，而且售價依然係$8，各位定要買番幾個攞好意頭。

「買」精品另類搶包

山長水遠入到長洲，冇理由唔帶啲手信返屋企，今年長洲各商舖都入咗唔少應節新貨，部分仲限量發售，當中小記推介3間特色小店畀大家。走到新興海傍街，專賣平安包精品的楊先生表示：「平安錶、嘟嘟包、散紙包等多款應節產品中，最特別係平安米雕包山擺設，包山內每個包都嵌入一粒粒嘅米雕，刻有『一生』或『平安』字句，若然各位想雕上其他字句，仲可為客人訂造，全部限量發售。」至於大新海傍路的飾物店蕭太指出：「我哋主打平安招財貓掛飾和擺設，上面印有唔同祝福語句，另外仲有以平安包為主題的包山棉花糖、咕o臣等。」北社海傍路的茶莊負責人郭先生謂：「除了賣開嘅茶餅、茶包外，今年仲引入咗外形似足傳統包山嘅包山仔，因為全由人手製作，所以貨量唔多，上面有一粒一粒嘅普洱茶，分大、中、細3種Size，仲有Slogan叫人『飲啖茶先食個包』。」咁有創意，就算遊客冇得親身搶包山，都可搶番啲平安包手信！

平安米雕包山 嵌入「一生」或「平安」米雕，其中一款仲識着燈。售價：$488（左）、$888（右）（a）

平安毛巾 印有「平安」字樣的毛巾，適合於人多擠迫加上曬到暈嘅環境抹汗。售價：$10（a）

「玩」Gimmick來自星星的飄色

每年長洲太平清醮，成條大街都塞滿人，皆因由朝早的舞麒麟及功夫表演，到下午的飄色會景巡遊，直至夜晚重頭戲搶包山決賽，節目多籮籮。

平安招財貓精品 備有貓貓掛飾及擺設等多種款式選擇。售價：$68/各（b）	茶包 外形和Size似足平安包嘅茶包。售價：$80/ 2個（c）	包山棉花糖 包山外形的盒內，約有20粒棉花糖。售價：$45（b）

當中飄色更會由童男童女扮演各界名人來諷刺時弊，長洲太平清醮值理會副主席何麗安笑言：「今年飄色嘅主題都幾到位，例如有個叫做『來自星星的守財奴』，小演員扮演韓劇《來自星星的你》的主角及財爺，暗諷財爺孤寒，好似來自外星咁，不理民間疾苦。另外有個主題叫『無商無量』，扮演運輸及房屋局局長張炳良，以及撐舢舨的OL，意思係新渡輪再咁加價落去，居民就要自己撐舢舨過海。」當晚11:30pm仲會舉行壓軸嘅搶包山比賽，今年特別加入新元素，何麗安表示：「今年適逢搶包山比賽復辦10周年，除了以往的9分、3分和1分包外，特別加入500個12分的金包，擺喺包山塔的頂部，務求令比賽更緊張刺激。」

郭錦記餅店負責人郭錦華，每年太平清醮都會製作大量平安包。	製包全面「睇」 Step 1：先將沙糖、水、麵粉等材料加入搓麵粉機（左）搓好，再以分麵糰機（右）把麵糰分成一定分量。 Step 2：以人手包入各式餡料，備有麻蓉、蓮蓉、豆沙3種口味。	Step 3：經過發酵後拎去蒸約15分鐘。

包山紮作傳人：兩日紮一座

各位近日去到北帝廟對開空地，定會見到3座50呎高的包山塔，原來呢幾座塔咁多年都係由陳氏家族一手包辦。自小跟隨父親紮包山的第2代傳人陳金原師傅表示：「我哋每年紮包山都會全家出動，男的負責紮包山，女的就貼平安包，材料需要約30支茅竹做骨架，而外面用的破竹，數量相等於20支茅竹左右，再由繩索和鐵線固定，齊晒材料的話約2天便可紮完一座，每座能夠掛上6,000個平安包。」

Step 4：最後以花紅粉開水，利用印章於包面印上「平安」二字。	包山紮作第2代傳人陳金原師傅表示，陳氏家族的男丁負責紮包山，約兩天便可紮起一座。	3座高50呎的包山塔以槓桿原理拉起，聳立於北帝廟對開的空地。

大家別以為祭祀用的包山，跟比賽用的包山同出一轍，其實係兩回事，陳師傅強調：「搶包山比賽用的包山唔係我哋整嘅，係康文署搵承建商搭建，裏面用上鐵架，只係外面用竹裝飾去模仿真包山。」

雖然聽晚先至係搶包山決賽，但工作人員已為包山貼上平安包。	「包山后」黃嘉欣表示，會調整心理質素來提升表現。	長洲太平清醮值理會副主席何麗安，講解太平清醮背後的故事。

上屆包山后：策略搶金包

去年榮膺「包山后」殊榮的黃嘉欣，本身有玩開攀石活動，她指搶包山比攀石容易，事關搶包的技巧只係一條直線向上衝，甚少左右移動，而最難的地方在於起步，需要做引體上升攀爬。「搶包山係由12位男女選手同場競技，如果同男健兒硬碰硬肯定搶得少，加上男仔的手比較大，能夠一手搶幾個包，所以策略上我會揀頂層稍低的位置開始搶包，以眼明手快來彌補不足，希望搶到12分金包。」搶包山賽事在即，她事前亦做足工夫，採取針對性的鍛煉方法：「搶包山主要運用臂力多於腳力，因此我採用攀石系統訓練，以及用手指頭兩截做引體上升，藉此提升手臂強度。」

太平清醮有段古

太平清醮近年搞到好似嘉年華咁又食又買又玩，但大家知唔知佢嘅由來呢？何麗安道：「約於200年前，即係清朝時期，長洲發生了一場瘟疫，有居民因染上瘟疫而逝世，惟當時醫學冇依家咁昌明，惟有求神問卜，喺北帝廟舉行醮會進行祭祀活動，而且齋戒3天，估唔到依場瘟疫真係消失咗，太平清醮亦因此持續了近200年，成為長洲每年習俗。」

5月6日太平清醮節目推介

時間 表演節目 地點

10:30am 舞麒麟及功夫表演 北帝康樂廣場

2:00pm至4:00pm 飄色會景巡遊 以北社街為起點

11:30pm至翌日12:25am 搶包山比賽 北帝廟遊樂場足球場

撰文、部分攝影：黎子豪