黑膠Hi-Fi 懷舊鬥玩味
潮流從來都係一個循環，曾幾何時被視為老餅嘢嘅黑膠，近年啲年輕人個個爭住玩，無論係鍾意黑膠獨有嘅音色，定係學人捽碟Jam歌，總之連音響大廠都翻頭推出黑膠Hi-Fi。機Gor今次揀咗TEAC LP-P1000同Philips OTT2000兩款人氣黑膠音響比併，佢哋嘅優點係毋須另購擴音機同喇叭，仲兼播CD同FM電台節目，連藍芽傳音都掂。至於邊部靚聲邊部好用，一試便知龍與鳳。
TEAC LP-P1000分體靚聲
來自日本嘅TEAC向來鍾情懷舊音響設計，早前推出嘅SL-D930以50年代老爺車為藍本。
今次LP-P1000帶有另一份懷舊感，黑膠唱盤加透明頂蓋，驟眼睇十足70年代唱盤，擺喺房Old School到暈。而且一對25W喇叭可獨立分拆擺位，炸機時音場開揚得多，同時設有Line Out插口，支援外接擴音機，將主機當成純黑膠唱盤都冇問題。
規格表
黑膠尺寸：7吋、12吋
轉速：33轉、45轉、78轉
兼播：黑膠、CD、FM、藍芽3.0
單元：38mm高音×2、100mm低音×2
輸出功率：25W×2
體積：460×380×215mm
重量：6.6kg
Philips OTT2000的骰型仔
機Gor巡舖同班音響老友吹水時，佢哋不約而同話近期黑膠冒起，無論音響同碟都多咗人買。針對新手，佢哋多會推介Philips OTT2000，尤其是女樂迷見到呢部機，雙眼立即發光，咁又難怪，皆因佢外形Classic，一體化設計又不失時尚感，而且將喇叭植入機身，擺喺書房或睡房都好慳位。最重要是此機可將黑膠歌曲轉成MP3錄入USB手指，靈活性強。
規格表
黑膠尺寸：7吋、12吋
轉速：33轉、45轉
兼播：黑膠、CD、FM、USB、藍芽2.1
單元：3吋全音×2
輸出功率：4W×2
體積：335×311×169mm
重量：3.5kg
黑膠唱碟如何發聲？
黑膠唱碟是一種圓形膠片，上面刻滿一條條聲槽，當唱針摩擦聲槽會引起震動，這些震動會令唱頭內的線圈產生交流訊號，唱頭擴音器負責將這些微弱訊號進一步放大，再傳送至喇叭播放。早期的黑膠碟多是45轉的細碟，每面只能錄1首歌，後來於1948年研發出面積較大的密紋LP唱碟，每面大約可錄6首歌，成為黑膠界主流。
第1回合︰黑膠鬥靚聲︰LP-P1000 Win
雖然CAS（Computer Audio Source）愈趨普及，但不少人仍鍾情黑膠那份味道。今次比併的兩機均支援7吋及12吋黑膠碟，最大分別是LP-P1000除支援33轉和45轉外，連播放SP的78轉亦對應；而且它採用金屬唱臂，防震能力較佳，加上唱盤設有膠軟墊，轉動時能緊緊地固定碟面。華仁影音音響專家南哥試聽後表示：「LP-P1000音色細緻，不像CAS般要經過DAC解碼，人聲圓潤自然。而OTT2000音色亦唔算差，惟獨輸出功率偏細，令音量受到限制。」
第2回合︰藍芽鬥穩定︰Draw
雖然唔少外國歌手依家都有出黑膠唱碟，但選擇始終冇CD咁多，幸好兩機兼播CD之餘，仲能透過藍芽播放手機或平板內的歌曲。機Gor測試兩機嘅藍芽傳音功力時，發覺約3~4秒便能成功配對，播歌反應靈敏，唔會喺串流時窒吓窒吓，就算將手機與音響距離拉遠至4~5米都唔會斷線，今個回合兩機握手言和。
第3回合︰連接鬥靈活︰OTT2000 Win
LP-P1000由於機身體積較大，接駁方面亦較為全面，除了AUX-in輸入插口外，另支援Line Out外接擴音機，將主機當作純黑膠唱盤使用。不過作為Hi-Fi，機Gor認為OTT2000更為實用，皆因佢可透過機面AUX-in及耳機插口聽歌外，仲加入USB插口，能將CD及黑膠歌曲，轉為MP3格式並儲存至USB手指，對於儲落一大堆黑膠唱碟又想帶出街聽的機Gor，更啱口味。
機Gor Report︰玩聲定玩樣？
兩款黑膠Hi-Fi主打嘅市場明顯有別，TEAC LP-P1000嘅分拆式喇叭配合強勁輸出，明顯為對音色有要求嘅用家設計；而Philips OTT2000外形時尚得嚟夠搶眼，雖然輸出功率弱咗啲，但二千幾元勁抵玩。究竟各位鍾意玩聲定玩樣呢？機Gor揀咗後者，皆因Hi-Fi仔多數擺喺房玩吓，當你個廳有部幾十萬嘅黑膠盤，就唔會玩番轉頭。
達人教路︰HiFi Gallery資深音響專家Ken Ho：「穩定是靚聲之本！」
「無論黑膠音響或唱盤，轉盤部分多以機械式運作，故穩定性可說是靚聲之本，轉速要夠平均，不能偏快偏慢；承軸轉動時亦不能有太大震動，皆因唱針極之敏感，會忠實地將這些震動雜音播放出來，影響音色清晰度及流暢感。」
機Gor Profile
機不離身，不信Spec只信測試，不扮高深，懶理低俗，貪新不忘舊。
撰文：機Gor
查詢電話：（a）2262 1173、（b）2418 0688