日本CP+直擊奇形怪招　相「影」成趣

一年一度相機界盛事CP+，昨天喺日本橫濱閉幕，環顧各大廠商2014新品，如Olympus、Panasonic、Fujifilm等都帶畀大家驚喜，而且好多設計都趣怪過癮，有啲玩獨門技術，有啲Sell外形出眾，好似Sigma便展出長條形嘅DP2 Quattro，個樣似足朱古力Bar，仲有一大班Show Girls任影，趣味滿Fun。

DP2 Quattro突破相機框框，以長條造型殺出血路。

DP2 Quattro長條形好手感

相機嘅外形總離不開四四方方，估唔到Sigma新機DP2 Quattro，唔似DP系列玩復古潮味，改以長條獨特外觀。咁爆嘅外形自然吸引現場人士圍觀，小記排咗近半個鐘隊先試玩到，一拎上手發覺佢嘅特大手柄幾好揸，單手Snapshot依然平衡穩定。最特別是用上名為Quattro的2,900萬像素Foveon X3 CMOS感光元件，它以「1:1:4」RGB結構，上層的2,000萬像素記錄光暗數據，其餘兩層各490萬像素則記錄色彩數據，廠方解釋，新結構配合TRUE III影像處理器，令拍攝速度快咗，加埋支30mm定焦鏡頭影相更爽。

SP-100 EE照準器狙擊

雖然Olympus喺展覽前已發布OM-D E-M10無反新機，但入到會場一樣有驚喜，展出支援50倍變焦的Stylus SP-100 EE。新機注目嘅地方唔係鏡頭Zoom到幾遠，而係於機頂新增照準器，皆因長炮Zoom到最遠時，大多會脫離原有構圖，使用照準器時鏡中便會出現紅點，只要以眼睛瞄準即可知道Zoom的位置，玩落有啲似狙擊槍Feel，用佢嚟瞄準目標夠創新。

DP2 Quattro試玩區打晒蛇餅，至少等30分鐘先有得玩。

機身超薄配以特大手柄，方便用家牢牢緊握機身。

GH4玩4K拍片

Panasonic早於年初CES展覽已展出新無反相機，不過當時連型號都未有，今次終於喺CP+揭曉答案，佢嘅型號就係LUMIX GH4。作為首部支援4K拍片的無反，Size差唔多相等於部單反咁大，而且4K質素貨真價實，支援100Mbps超高流量影像。唔少人都想知4K有幾Sharp，現場就準備咗多部大電視播放由GH4攝錄的影像，好多人都睇到嘩嘩聲。

配上30mm F2.8定焦鏡頭，相等於45mm等效焦距。

雖然感光元件為2,900萬像素，但選擇S-HI畫質可谷至3,900萬像素。

放大圖片

X-T1復古扮單反

行去Fujifilm攤位時，離遠已見到勁多人圍觀，原來現場有Show Girls之餘，仲有X-T1無反任試。新機除了繼續玩復古外，特設236萬像素電子觀景器，望落去似足單反，配合3吋翻揭式屏幕及鎂合金機身，提供防水防塵效能，難怪感覺咁硬淨，落住雨去影相都唔使怕。

觀景器上方的小窗就係照準器，入面有紅點畀「狙擊手」瞄準目標。

Olympus SP-100 EE特別在加入照準器，唔怕Zoom到最遠時脫離構圖。

Olympus SP-100 EE特別在加入照準器，唔怕Zoom到最遠時脫離構圖。

P600超長炮

Nikon今年喺CP+就冇大機壓陣，以多部COOLPIX機仔撐場，令人有少少跌眼鏡。好彩機海數量夠多，包括F1.8大光圈P340、60倍變焦長炮P600、內置Wi-Fi的四防機AW120等。當中P600成為全場焦點，能Zoom到1,440mm咁遠，小記企勁遠都影到玩緊機嘅參觀者，帶去旅行夠晒用。

4K無反相機終於現真身，型號為LUMIX GH4。	現場設有多部電視畀大家睇GH4拍嘅4K影像。	X-T1繼續玩復古，有趣在外形望落似單反多過無反。
今年Nikon冇大機或新鏡，最有睇頭係呢部60倍變焦長炮P600。

Nikon攤位設有女子工作坊，可自製小手工之後影相。

玩轉天涯鏡

鏡頭廠Tamron帶來兩支全新天涯鏡，令唔少龍友嚴陣以待，當中包括16~300mm F3.5~6.3 Di II VC PZD Macro（B016），有成18.8倍變焦；還有針對全片幅相機的28~300mm F3.5~6.3 Di VC PZD（A010）。兩支鏡頭均支援VC防手震及PZD超聲波馬達，唔怪得聽唔到對焦聲啦！