愛侶Camping自製湯圓營元宵

話咁快下星期就到情人節,今年2月14日仲有雙重意義,皆因撞正俗稱「中國情人節」嘅元宵,可以話雙倍浪漫。咁難得嘅日子,梗係要同愛侶孖住一齊過,唔想次次都行街、睇戲、食飯咁大路,不如試吓衝出市區,同愛人喺大片草地紮營過夜,仲可以一齊整風箏、數星星兼煮湯圓,過一個Sweet爆元宵節!

露營活動 裝備全包

元宵節Camping數星星咁窩心,當然唔係小記諗出嚟,其實活動由專搞露營嘅「綠趣坊」舉辦,負責人Mac表示:「一般露營大家就玩得多,今次我哋趁元宵佳節,加番啲Sweet Sweet元素,務求讓各位過一個難忘之夜!」話明係Camping活動,當然要有足夠裝備,主辦單位除了會為參加者預備主要露營裝備,包括背囊、營幕、地蓆、煮食爐、水袋等,連簡單早午晚餐食材如通粉、蔬菜等都有,如果想豐富啲仲可自備食物添!不過各位當日帶齊衣物及緊急用品已基本搞掂,唔使為裝備撲餐懵。

西貢灣仔 大片草原

今次營地選址喺西貢灣仔半島,於黃石碼頭搭街渡可直達。其實這裏分為南、西兩大營地,前者有一個臨海草地,鍾意吹海風嘅露營發燒友會揀呢度落腳;後者則位處山上,望唔到海,但有一大片草原,空間大啲加上人煙稀少。今次便選擇咗西營地,乘船抵達後行上山約10分鐘即達,情侶拖住手傾吓偈,話咁快就到。西營地約可容納20個營,放眼所見,草地有成個標準足球場咁大,有少少外國Feel!

二人協力 DIY風箏

到達營地之後,Mac會即場教大家點樣紮好個營,睇完示範後男男女女便可各自行動,一齊拉幕、落營釘、鋪地蓆,同心協力不知幾溫馨。整好個營就到活動時間,喺咁空曠嘅環境下,最啱就係放風箏,不過大家唔使預早買風箏,皆因Mac已預備好材料教你DIY,當中包括竹枝、棉線、塑膠袋、魚絲。不過要整骨架一啲都唔易,度位要準確,穿線要細心,整完之後仲可為風箏粉飾一番,喺風箏寫下甜蜜語句,見到又點會唔冧呢?

美味湯圓 溫馨賞月

湯圓寓意團圓及圓滿幸福,元宵當日梗係要應吓節啦。Mac會教大家落手落腳搓麵糰、落餡料,再加黃糖、薑片等製作湯圓,過程簡單;拎住碗熱辣辣嘅湯圓,你一啖時我一啖,簡直甜入心。食完糖水原來仲有嘢玩,皆因元宵當日正好係月圓之夜,而灣仔營地冇高樓大廈遮擋,抬頭一望睇到圓圓嘅月光,仲可以順道數星星,鍾意兩個人靜靜睇又得,擺定腳架影吓星空亦得,浪漫滿分。

灣仔營地點樣去?

灣仔營地位於西貢,前往方法有兩個,一係由黃石碼頭乘搭渡輪或街渡,船程約10分鐘。又或者從西貢碼頭乘搭小巴往海下灣,再步行約半小時。

活動詳情

日期:2月14至15日(2月12日截止報名)

費用:$288/位(成人)$268/位(12歲以下小童)

查詢電話:6446 9496

網址:www.naturefun.net

同場加映

唔想去郊外慶祝元宵的話,其實市區都有不少好去處,有傳統嘅綵燈會,有商場嘅靚靚布置,同情人一齊去逛吓都唔錯。

綵燈會 好節目

元宵節傳統會有大型綵燈晚會,猜燈謎、睇表演,活動多多。想感受一下熱鬧氣氛,就一定要Mark實2月14日。康文署呢日會喺各區舉辦元宵綵燈會,當中以文化中心露天廣場舉行嘅最具規模,有綵燈展覽、民族歌舞、傳統舞台技藝,大家仲可以玩遊戲攤位,熱熱鬧鬧過元宵!

日期:2014年2月14日

地點:香港文化中心露天廣場

東港城 繁花裝飾

唔少男士喺情人節會送花畀另一半,如果愛人都鍾意花的話,咁就要帶佢嚟東港城,皆因商場用上8萬朵新鮮蘭花及手工絲花打造3,000呎御花園,除咗有以中國七仙女為題材嘅「花仙之境」、用白蘭打造嘅「甜蜜天鵝湖」外,另有用上1,314朵花製成的拱門「心意福門」,同愛人合照就最好不過。

日期:由即日起至2月16日

地點:將軍澳東港城

海港城 500花燈鋪天

花燈係元宵節嘅傳統象徵,海港城今年將超過500個「花燈」裝飾,布置於正門及露天廣場,令現場環境充滿元宵節甜蜜感覺。另外,正門入口設計成一個高20呎的心形拱門,留影必到!

日期:由即日起

地點:尖沙咀海港城

撰文:林子聰

部分攝影:郭凱敏

模特兒:Miki、Long