DIY洗車攻略閃令過年

不少人視車如老婆，照顧無微不至，適逢明日年廿八，梗要親手幫愛車洗白白啦。不過洗車要講步驟，程序搞錯隨時弄巧成拙，先唔講有機會弄花車身，使用不當毛巾抹車，搞到成車黐晒毛頭已經夠煩，有心幫部車扮靚，應選用合適的用品，唔好貪方便求其執起條「祝君早安」就算。幫部車做個玻璃塗膜（Coating），仲可以容光煥發過新年。

毋須久等洗車店

自古相傳年廿八要洗邋遢，但冇人話一定要親自動手，有人認為花數百元畀人洗車乾手淨腳唔使煩，不過別忘記今、明兩天是洗車店全年最旺的日子，輪候時間分分鐘要三、四個小時以上，部分店舖更會坐地起價或只招待會員，唔想排隊排餐懵，自己動手好過。洗車並唔係好複雜，一個鐘左右已搞得掂，但謹記不要在繁忙或太僻靜的地方洗車，一來避免阻礙其他道路使用者，二來可減低遇劫的風險。洗車也要顧及公德，盡可能不要隨街傾倒污水，在公眾地方棄置化學物品（如偈油）更屬違法，謹記呀！

車身過熱不宜淋水

除非部車有千年污漬，或者車身黐上石屎、瀝青等，否則洗車都可以自己一手一腳搞掂，所需用品亦不多，就算自己做埋塗膜，埋單都係幾百元，洗車工具又可循環使用，加上一支幾十元的清潔劑可以用好多次，每年可慳唔少。洗車要講步驟，不能亂來，譬如行車過後，千萬不要即時用水淋向輪圈，否則有機會令迫力碟因冷縮熱脹而變形，建議先清潔車廂，待制動系統冷卻才清洗車身及輪圈。清潔車身前，必須先淋濕車身（用高壓水槍更佳），將車漆表面的灰塵沖走，如果身處地方沒有自來水，可改用塵掃，千萬不要未掃走沙石及泥塵便使用洗車液及海綿捽擦，此舉很易刮花車身，到時搞到部車傷痕纍纍就無謂了。