夜攝高手S200大光圈鬥到抵

搏殺咗一年，係時候買啲禮物獎勵自己。想要一部實用又抵玩嘅相機，Canon全新PowerShot S200或許啱你要求，除了擁有F2.0大光圈5倍變焦鏡頭，仲內置大熱嘅Wi-Fi功能，最重要係呢部「黑夜之王」S系列DC，三千蚊都唔使，新年換新機都唔使打爛豬仔錢罌。

PowerShot S200 售價：$2,580（a）配備F2.0大光圈鏡頭，而且提供24mm廣角。

24~120mm變焦鏡頭

以往大光圈DC動輒要三四千元以上，但擁有F2.0大光圈嘅S200卻平上一截，還於24~120mm鏡頭加入IS防震系統，在低光環境依然能拍出清晰影像，亦有助營造前清後朦景深效果。

貴為PowerShot S系列高階DC，事實上佢一啲都唔難用，鏡頭外圍設有操作環，能因應不同模式快速調校拍攝參數；而機頂轉盤提供入門用家適用的LIVE，可實時預覽光暗、飽和度及色調效果，就算影相新手都可拍出靚相。

彈出式閃光燈影人最啱用，可於昏暗環境幫手補光。

操作環方便用家於不同模式快速調校設定。

NB-6LH專用鋰電池配上省電模式拍攝，約可影300張相片。

轉用高感光度CCD

新機之所以咁實惠，相信最大原因是感光元件由以往的CMOS改用高感光度1,010萬像素CCD，配合新型DIGIC 5影像處理器，令感光度達ISO 80~6,400。新機追求畫質之餘更講玩味，提供9種濾鏡特效畀你玩，包括魚眼、玩具相機、柔焦等，部分濾鏡仲兼容拍片模式，無論影相或拍片都能玩出個人風格。惟要留意拍片最高畫質僅達720p標準，若能一併升級至1,080p便更完美。

機頂轉盤加入LIVE實時控制模式。

背面的按鍵編排簡潔易上手，仲設有Wi-Fi快捷鍵。

機身大過張八達通少少，袋入褲袋都冇問題。

Wi-Fi即拍即Share

唔少人買相機都會睇外形，新機的線條偏向圓潤，並備有黑色和白色選擇，男女用家都兼顧到。為迎合網絡分享潮流，新機更植入Wi-Fi功能，只要於智能裝置安裝《CameraWindow》程式，即能以Wi-Fi傳送影像，方便於手機作後期加工和即時分享。其Wi-Fi不僅能連接手機或平板，亦能配對指定相機、手提電腦、打印機和雲端服務，使用上更多元化。