ZCWO 1:6林雪Figure 肥警出更
Action Figure嘅題材大多係超級英雄，靚歸靚，但玩得多總會悶，所以好多玩家特別鍾情偏門人物，如ZCWO新推《機動部隊︰同袍》的肥棠一角，將林雪製作成1:6 Figure，雙頭雕、肥Body加全副武裝，絕對能滿足玩家的另類要求。
頭雕逼真
ZCWO愛出港產片Figures，如《英雄本色》Mark哥便是成功例子之一，今次林雪取材自肥棠一角。廠方表示，為了力臻完美，將預售時間推遲了一季；從大貨所見的確冇令人失望，粗眉、豬膽鼻加二撇雞極為像真，連下巴粒癦都跟到足。而且一個價錢就有齊Skin Head和分界兩款頭雕，就算賣番出去都有價有市。
大量配件
林雪肥就人所共知，用番大隻Body並不稱身，故廠商特別打造出肥人Body，以海綿塞滿肚腩，並改短雙腳。服裝方面則延續賣大包精神，除了綠色軍裝、皮製腰帶及軟膠軍Boot外，仲跟足戲中造型送埋防彈背心、防彈頭盔及貝雷帽，當中頭盔經過金屬塗裝及舊化處理，誠意十足！其他配件一樣大堆頭，包括M10左輪、伸縮警棍、胡椒噴霧、孖葉、快速上彈器、水樽、對講機、電筒同原子筆；而戲中肥棠冇用過嘅M870基本型及戰術型霰彈槍都送埋畀大家。
撰文︰陳志滔
攝影︰張群生
查詢電話︰2366 2688