Xbox新Game體驗館打到2014

Xbox One今個星期五在美國開賣，到呢一刻都未知香港幾時返貨。不過就算次世代主機推出後，都唔代表Xbox 360冇遊戲玩，好似新推出嘅《LEGO Marvel Super Heroes》及《World of Tanks》就係好例子，前者簡單有趣，後者刺激過癮。仲未夠喉？Xbox剛在旺角信和中心地庫開設「新Game體驗館」，畀大家試玩十幾款新遊戲，間舖開到2014年1月5日，經過旺角記得去打餐飽！

LEGO版Marvel英雄大戰

LEGO出過好幾套以電影為主題的遊戲，由《魔戒》、《哈利波特》到《星戰》等，今次更與《復仇者聯盟》拉上關係，在《LEGO Marvel Super Heroes》玩盡逾150位超級英雄，在紐約市對抗惡勢力。好多角色都粉墨登場，包括蜘蛛俠、Iron Man、Hulk等，每位角色都有獨特技能，如Iron Man可飛天、蜘蛛俠識得用繩索行走，惟獨體形巨大的Hulk唔多似「人仔」。玩法方面，有動作有射擊，還可沿路執拾LEGO散件組成特別裝置，亦要運用角色獨有技能解謎，好啱一家大細玩。Xbox更罕有地為呢款遊戲推出Xbox 360同綑版，今個星期五就有得賣，同期於旺角信和設有「LEGO Marvel Super Heroes主題館」，現場會展出3位LEGO設計師所砌的8個LEGO版超級英雄添！

30人揸坦克激鬥

《World of Tanks》Xbox 360版剛登場，雖然只限Xbox LIVE金會員免費玩，但可於遊戲內揀選美國、德國、法國、蘇聯及中國款式的坦克，進行15對15網上對戰，聽落已經吸引。遊戲畫面跟PC版差不多，流暢度十足，而且用手掣操控會較易上手，跟一般射擊遊戲的操控方法相似，炸爆敵人坦克好有快感！