NBA Live與2K系列向來鬥得難分難解，有傳《NBA Live 14》將於11月跟次世代主機推出，另一陣營自然不敢怠慢，近日搶先推出《NBA 2K14》，仲以勒邦占士（LeBron James）做封面，加入好多「大帝」元素，包括其獨有生涯模式，並收錄占士親自挑選的配樂如Jay-Z、Eminem、The Black Keys等，球迷一定玩得過癮！
早兩年2K系列中，玩家可以扮演波神米高佐敦在經典賽出戰，但換成現役當打嘅占士又可以點玩？《NBA 2K14》占士模式可說是上集「My Player」模式的強化版，玩家要扮演占士在未來7年稱霸NBA，可以揀選繼續留在邁亞密熱火，或轉戰另一支球隊，試吓以一人之力帶領球隊爭奪總冠軍。想挑戰高難度的話，去奧蘭多魔術或者夏洛特山貓這兩支上屆成績最差的球隊吧！
2K系列的球員精細度向來做得好好，到新作其實改變不多，只是從個人技巧及AI兩方面作改進。每個NBA球員今集都加入招牌技巧（Signature Skills），即是真實球員在場內最煞食嘅招數，如擅長搶奪籃板、專射3分波或者高速運球之類，當然星級球員擁有嘅技巧會較多。此外，球員AI亦得到重整，電腦會根據玩家的進攻模式自動調整防守策略，想用屈機招數更難；同時防守系統亦經過強化，身體碰撞會變得更激烈，而且偷波成功率會提升，所以用番上集嘅玩法去玩時，經常會被對方偷波及截到傳球。
遊戲強調真實感，球員狀態更會對應現實環境，透過動態即時球員名單（Dynamic Living Rosters），如果球員在真實環境「On Fire」的話，遊戲內的能力值便會大大提升；相反實際表現低沉或受傷，亦會反映在遊戲之內，打機時都要祈求自己喜愛嘅球星在真實比賽交足功課。雖然NBA受歡迎，但成日都用呢班球員，唔多唔少會減低新鮮感，今集便首度加入歐洲籃球聯賽一流球隊，收錄咗西班牙、土耳其、意大利、以色列及希臘等14支強隊。有趣的是加回組隊模式，玩家可用「My Player」模式自創球員，埋班湊成5人球隊，然後上網搵人挑機。
撰文：布偉倫