4,100萬像素Lumia 1020 影相無敵手

蕉王8110、鬚刨王8810、換殼王3210……Nokia創造了無數經典，雖然這昔日巨人的手機業務最近被Microsoft收購，但不代表經典故事就此完結。新機Lumia 1020坐擁4,100萬像素鏡頭及《Nokia Pro Camera》影相工具，拍攝質素堪稱業界最強。以後數Nokia經典手機，要預埋佢了！

裝上附送的手把（原價$588）後，似足DC般操作，符合人體工學設計。

裁相後依然高質

手機拍攝一向被視為「小學雞」玩意，但Lumia 1020一出，相信龍友都要收聲。事關這部影相神器備有4,100萬像素鏡頭，相片解像度可達7,712×5,360之高，不但用來曬海報綽綽有餘，就算將局部位置裁切放大，其解像度依然高，剪輯後Keep到極佳質素。另備有1/1.5吋感光元件，蔡司鏡頭更支援F2.2大光圈，配合ISO 3,200感光度，就算唔開Xenon閃光燈，室內影人影景依然亮度充足，最啱女仔玩自拍兼影食物之用。

黃色手把操作佳

外形方面，驟眼睇新機跟早前推出的Lumia 925極為相似，同樣採用4.5吋AMOLED芒及直板機身，不過外殼物料由鋁金屬改為聚碳酸酯，雖然這令重量略為增加，但能有效改善手感，影相都定啲啦！若嫌未夠定，跟機更附送專用手把一個，加裝黃色手把後，小記第一個感覺係兒戲又笨重，但拎上手卻出奇咁好揸，仲有齊快門掣、腳架孔及1,020mAh電池，長按快門仲可直入影相Mode，操作與DC無異。唯一要彈係冇咗變焦掣，放大縮細要靠篤芒。

機身搭載4.5吋屏幕，沿用WP8磚頭介面。

售價：$6,298 /各（附送原裝手把）

拍攝取景預覽效果

新機沿用WP8系統，配合1.5GHz雙核心處理器，撥頁、開Apps好爽快。但小記玩咗手機咁耐，始終覺得磚頭介面唔多好用，所以着眼點一早放喺廠商自家研發的《Nokia Pro Camera》工具。它備有環狀影相介面，可讓用家快速調校曝光值、快門、ISO、焦距及白平衡，而且調校數值時，取景框會即時顯示效果，勁方便！其另一優點係可同步拍攝3,800萬像素及500萬像素相片各一張，方便將細Size靚相直接掟上facebook，攞Like話咁易。

一體成形機身，要用針拮先換到SIM卡。	手把部分較為凸出，而底部備有腳架孔。	鬥靚芒 Lumia 1020（左）用咗AMOLED屏幕技術，顏色比iPhone 5（右）飽和鮮艷。
市場總監Gary Chan