中秋 Camp Cook 螢月夜

今個禮拜四就到中秋節，加上翌日係紅假，隨時可以放晒五六日3 Days，梗係要玩盡日與夜。不如試吓到戶外Camp Cook兼賞月！今次小記約了Camp Style露營達人阿晉，到貝澳營地日頭玩野炊，夜晚到旁邊嘅沙灘搞「螢」月派對，迎接中秋來臨。

迎月玩Camp Cook！

日歎野炊風味

好多人以為玩Camping一定要過夜露宿，其實它有多種玩法，Camp Cook便是其中一類。中秋與三五知己相聚，最好梗係邊食嘢、邊傾偈，露營網站Camp Style負責人阿晉教路：「傳統Camp Cook所需嘅爐具較多，基本上要玩開露營嘅人先有齊裝備，而且煮菜嘅難度和技巧亦相對較高，入門人士未必啱玩。因此我今次帶咗以『燒』為主題嘅簡化版Cook Set，一個迷你韓燒爐或迷你BBQ爐便可起行，簡單將食材燒兩燒就食得，輕鬆享受Camp Cook樂趣。」

便攜迷你爐具

今次用嘅韓燒爐、BBQ爐都以迷你設計，前者係傳統酒精爐嘅變種用法，只要喺爐上加裝一塊小型鐵板，便可玩韓式燒烤。而外形似足金字塔嘅BBQ爐，只要於爐底擺炭，爐面加個鐵絲網即可玩BBQ，最正係個爐摺埋只有約40×20×6cm可以放入袋仔，便攜性十足！雖然爐具的骰，但賞月菜色絕不兒戲，頭盤先嚟美式三色椒牛柳串燒，主菜整個韓式五花肉生菜包，最後追加中式腐竹雞蛋糖水，集各國之大成，最重要係可以食到原野風味之餘，工夫少又易煮。

「螢」格過中秋！

用螢光波玩Light Painting，畫月亮又得，玩鬼影變幻球亦得。

鬼影變幻球

夜玩螢光塗鴉

香港有不少營地或燒烤場鄰近沙灘，飲飽食醉之後，當然要趁月圓之夜到沙灘玩個夠！各位大可以應吓節玩螢光棒或自製螢光Tattoo，仲可以趁夜晚玩埋近年熱爆嘅Light Painting光影塗鴉。玩法好簡單，只要以支援長曝功能的相機或智能手機，利用慢快門去捕捉發光物體移動嘅軌迹；而螢光棒顏色搶眼又多色，光軌自然特別突出。如果想效果好啲，小記建議大家將螢光棒屈成螢光球，光影效果別有一番風味。嫌Light Painting未夠「螢」？各位仲可帶埋螢光油，塗上手、腳、臉等地方，即時製作螢光Tattoo，夜麻麻識發光，十足去咗螢光派對，夠晒過癮！

想玩Camp Cook生火煮食，記住要喺指定燒烤場或露營地點。	這是阿晉的私伙BBQ爐，如想購買類似款式的話，可考慮「火楓戶外燒烤爐」，售價約$330。（a）	塗完螢光油記住喺光線下儲光，跟住去暗嘅地方便識得發光。
Trangia酒精爐備有不同Size，售價約$780至$860（a）；而迷你鐵板要喺大型煮食用品店或露營用品店才能找到，阿晉話賣$110左右。	傳統中式糖水除了加鐵板玩韓燒，在酒精爐上方換番個煲，便可炮製腐竹雞蛋糖水。超市有售嘅糖水湯包已有晒所需食材，擺落煲加水煮滾就食得，夜晚邊賞月邊歎糖水勁Sweet。	有10年露營經驗、Camp Style網站負責人之一阿晉，以酒精爐炮製腐竹雞蛋糖水。