芒亨4儲氣斬黑蝕龍

亞洲版與日版之分

想趁《Monster Hunter 4》推出而入手N3DS遊戲機？除咗可以諗吓日版同綑裝外，仲可考慮香港行版N3DS（售價：$1,499）同N3DS XL（售價：$1,749）主機。今次Capcom會推出行版主機專用嘅芒亨4亞洲版遊戲，雖然同樣以日文顯示，但附送中文說明書，兼可跟日版玩家連線屠龍，看來廠方睇得出單靠日本市場唔多足夠。至於已擁有日版N3DS嘅機主，就無緣玩亞洲版遊戲啦，記得夾番日版Game呀！

新增段差跳躍攻擊

芒亨向來嘅玩法不外乎擸武器、用道具圍剿魔物，新作強調立體化攻擊，其實係利用地圖高低落差，在高處疾走並跳到空中攻擊魔物，只要就啱位，玩家甚至能夠跳到魔物頭上作出重擊。新作有些龍種會不斷噴出「狂龍病毒」，玩家中毒太深便會喪失體力復原嘅能力。而新魔物中最有霸氣首推「黑蝕龍」哥亞‧瑪卡拉，另有巨大下顎的「鬼蛙」鐵茲卡布拉，以及背部擁有大型鱗甲並擅長尾部攻擊的「絞蛇龍」卡拉拉阿杰拉，唔帶齊裝備真係冇得打。

以劍充氣用斧出招

魔物進化之餘，武器方面亦同樣「升呢」。去年Capcom已公布了操蟲棍，棍上附有獵蟲，可於狩獵時吸取魔物精華來強化能力，並能利用長棍支撐地面作出段差跳躍攻擊。但要養蟲，就要為獵蟲提供蟲餌，玩家可於野外採集或在任務中獲取。至於另一款新武器充能斧，是以劍跟盾組合而成的武器，特點是擁有「劍模式」同「斧模式」，前者攻擊力較弱，但可以儲氣，當切換到殺傷力強的「斧模式」時，即可發動「屬性解放斬」，不過於「斧模式」時用家將無法作出防禦，所以揸充能斧記得不斷轉Mode呀！

DETAILS

類型：狩獵動作

開發：Capcom

平台：N3DS

售價：$368（亞洲版）

約$400（日版）

查詢電話：2359 7998

撰文：布偉倫