Nissan March 小改款大誘惑

本港車用汽油價格持續高企，油費開支佔養車成本比例不少，對於預算不太多的後生仔來說，經濟、節能小車自然是首選。最近，日產（Nissan）帶來了2013年款March，除了外形及車廂經過修飾外，還追加了智能停車熄匙系統（Idling Stop System），耗油量進一步降低，每公升汽油可行走23km（日本「JC08」模式），油費成本計落大約$0.7/km，日日揸都唔怕肉赤！

售價：$155,800

車身小巧內櫳闊落

March是一款城市compact car，具備小巧、慳油的特性，而且形象愈來愈後生，對於年輕人及「新牌仔」自然有一定吸引力。2013年款March的車長增加45mm至3,825mm，而最小迴旋半徑只是4.5m，加上擋風玻璃面積夠大、視野廣闊，睇位比不少體積相若的hatchback都要易，無論鬧市穿梭或進出停車場都輕鬆過人。儘管March車仔細細，但別低估其實用性，後座坐上兩名成年人，伸展空間仍非常充裕，內櫳較想像中闊落得多。若要擺放大型行李，只要簡單地將後座椅背向前翻平，載物空間便可大幅擴展。

油耗23km/L勝前款7%

作為平日代步車，不用很大馬力，只要能應付日常需要便足夠。以慳油掛帥的March搭載了一副1.2公升直三引擎，最大馬力與扭力分別為79ps及10.8kgm，應付本港路面游刃有餘，惟不要期望有澎湃的加速性能，慳油才是重點所在！為進一步減省油耗，新March追加了智能停車熄匙系統，只要電量充足，停車時會自動關上引擎，直至鬆開制動腳踏才會重新點火，期間冷暖氣及音響系統仍可如常運作。因引擎的怠速時間減少，燃油效率得到大幅提升，根據日本「JC08」模式，平均每公升汽油可走23km，較改款前的21.4km增加超過7%。

引擎動力輸出線性，而且耗油量低。

後座椅背向前翻下，可增加載物量。

車身座椅顏色選擇多

新March的外觀有多處改動，鬼面罩、泵把、門邊手挽以至頭、尾燈組都經過重新設計，並新增了Nadeshiko Pink及Olive Gold兩種顏色，感覺煥然一新。同時，代理提供多種座椅皮革顏色選配，特別到連紫色都有得揀，單憑呢點，相信可冧到唔少女客人。主攻年輕人市場的March，車廂設備也顧及後生一輩口味，標準配備包括支援USB輸入的音響系統，錶板還有特別節目提示（日文），任何重要紀念日都可輸入系統，這樣就不怕忘記特別日子激嬲朋友啦！March獲認可為環保汽油私家車，可獲稅務寬減優惠，車價僅$155,800，如果分5年供，以利息2.5厘計算，月供都係兩千幾蚊，養車開支更易應付。