Rupert Sanderson沿途有履

Rupert Sanderson正是深明鞋履地位無可代替，才由廣告才俊來個180度急轉彎，成為鞋履界響噹噹的設計師，不過他卻忠告新人：鞋履設計師不易為。要創造出如此魔物，心情如坐過山車，但他一坐十多年，依然樂在其中。你有膽量加入嗎？

英國著名鞋履設計師Rupert Sanderson自2001年創立同名品牌，十多年間已升呢成為星級品牌，荷里活女星Gwyneth Paltrow、Amanda Seyfried、Emma Stone、Victoria Beckham外，連英國威廉王妃Kate Middleton也是其捧場客。不過，Rupert Sanderson並非一開始就學造鞋，大學畢業後的他從事與鞋履毫無關係的廣告創作，其後他毅然放棄廣告專業，轉往培育出Jimmy Choo等著名鞋匠的Cordwainers College進修。

23K金箔鞋跟，閃亮奢華。	舒淇以品牌的桃紅色高跟鞋配襯同色裙子，美艷動人。	女星Eva Longoria穿着品牌的高跟鞋出席康城電影節。

對於突然轉行，Rupert Sanderson只能說有種覺今是而昨非之感：「我覺得設計鞋先係自己應該做嘅嘢，之前嘅選擇係錯。其實我一直都好鍾意鞋，當年突然閃過一個念頭就係我都可以設計鞋。好多人都會注意其他人着咩鞋，從一個人所着嘅鞋就可以睇得出佢嘅性格，所以我覺得鞋嘅影響力係好大，我好想自己親手去創造出一樣咁偉大嘅物件。」對於Rupert Sanderson的決定，他的家人及朋友並未感到驚訝，反而認為理所當然，他笑言：「佢哋都覺得我有呢方面嘅才能，原來我自己係最後一個知道。」

女星Nina Dobrev是品牌的捧場客。	Rupert Sanderson早前特來港出席專門店開幕。	專門店設計簡約，空間感十足。

入行前要考慮清楚

Rupert Sanderson利用進修期間的兩個暑假，騎着摩托車環遊意大利的鞋廠、皮革廠，深入學習造鞋，旅程不但令他大開眼界，亦令他深深迷戀上造鞋工藝，他憶述說：「意大利之旅真係一個好好嘅體驗，意大利就好似我第二個家，我喺當地工作、學意大利文，仲邂逅咗我依家嘅太太以及認識到好多朋友，當地嘅鞋匠大師都畀咗我好多啟發。」

23K金箔鞋跟高跟鞋 $5,580	放大圖片	「鐵絲」蝴蝶結露趾短靴

問到身為鞋履大師的Rupert Sanderson，對入行的新人有甚麼忠告時，他竟然說：「不要入行，因為呢行好難。」他坦言要創作出一雙完美的鞋，要有好的設計以及高超的工藝兩者結合，所以並不容易，他續說：「每兩三個月就要設計新系列，仲要經常飛去唔同嘅國家，所有嘢都嚟得好快，你好難有好充足嘅準備，所以如果真係要入行，就要諗清楚，至少考慮兩次。」他笑言可能一番說話會嚇退不少有志之士，但只想他們入行前考慮清楚，不要低估鞋履設計師這份工作。

「鐵絲」蝴蝶結露趾高跟鞋	「鐵絲」蝴蝶結尖頭鞋	鸚鵡刺繡圖案高跟鞋 $10,800

下一件作品會更好

雖然Rupert Sanderson口中說難說辛苦，但從他的言談中卻感受到他其實樂在其中，對設計充滿熱情及興奮，正可反映出他對鞋履創作有多着迷及熱愛，他不諱言：「當做設計嘅時候，所有用料、顏色、條線都配合得天衣無縫，你預感到一件好嘅作品即將面世，嗰種感覺真係好滿足，呢個係最高點，但每次作品面世後，又會跌落低點，你會覺得自己下一件作品會更好，會推動你繼續創作，又重新上番最高點，就係經常咁又高又低。」

他又指鞋履設計的魅力在於小小一對鞋，卻足以影響整個造型及打扮，他說：「如果着住件好靚嘅衫，但着錯鞋，可以毀咗整個total look，相反如果件衫好簡單，但配一對好靚嘅鞋，就會即時將整個打扮提升。」

為保質素自家生產

Rupert Sanderson的鞋履以「less is more」為設計美學，沒有任何浮誇的裝飾，每雙鞋都顯得高貴優雅，而且他特別注重舒適，運用線條、平衡及對稱，以及專注研究鞋模的尺寸及形狀，令五吋高的高跟鞋也可以如履平地般舒服，而為了確保生產質素，他於2006年買下意大利Bologna的製鞋工場作自家生產，每對鞋也由人手打造。

Rupert Sanderson表示設計鞋履時，沒有特定對象，亦不會只有單一的靈感來源，他解釋：「每樣嘢都可以成為我嘅靈感，例如入到一間房，牆壁嘅顏色，梳化嘅布料，都可以畀到我啟發。我設計嘅時候唔會諗住邊一個人着，只注重鞋本身，對我嚟講最重要係簡約線條以及質料，如果做得唔好，就會令其他人失望。相比其他鞋，高跟鞋可能比較唔實際，要做出一對舒服嘅高跟鞋，基本好重要，只要用嘅質料係靚係頂級，做出嚟嘅鞋就着得舒服。」

Rupert Sanderson一直只創作女裝鞋，亦曾與多位重量級時裝設計師合作，包括Karl Lagerfeld以及Antonio Berardi，不過他卻無意設計男裝鞋，他坦言：「有段時間我只有一兩對鞋，我對自己嘅鞋冇興趣，我雖然係鞋嘅設計師，但唔係鞋嘅消費者，呢個係好複雜嘅關係。女裝鞋同男裝鞋好唔同，我鍾意純粹單一，只做一樣我做得最好嘅嘢，我係女裝鞋嘅設計師，我好享受呢方面嘅樂趣。」

才華備受肯定

英國鞋履設計師Rupert Sanderson出生於1966年，畢業於Royal Holloway and Bedford New College，後放棄廣告事業，入讀Cordwainers College修讀鞋履設計，他曾在著名鞋履品牌Sergio Rossi及Bruno Magli工作，2001年自立門戶推出同名鞋履品牌，所有鞋履均由意大利人手打造，精緻簡約，獲得行內一致讚賞，他分別於2008年及2009年獲「Accessory Designer of the Year」獎項，才華備受肯定。

Rupert Sanderson在港擁有兩間專門店，其中一間專門店早前開幕，他亦專程來港，並大讚香港是個充滿活力的城市。

採訪：陳嘉敏

攝影：吳文聰