低等生活:名廚小販大鬥法

在新加坡期間,當地朋友告知:「呢度發生大件事,你有冇睇報紙?」瞄瞄頭版新聞,除了重要時事消息,便是Gordon Ramsay煮飯圖片。

Gordon Ramsay是英國米芝蓮星級名廚,真人騷《地獄廚房》總舵主,應邀到新加坡參加名為「小販英雄廚藝大比併」,與當地三個飲食單位天天海南雞飯、珍寶餐飲集團及328加東叻沙一較高下,在鏡頭前即席炮製海南雞飯、辣椒螃蟹和叻沙3種地道美食,讓1,000名現場民眾賞味再投選決勝負。結果Gordon Ramsay一勝兩負,贏了珍寶餐飲集團的辣椒螃蟹,輸給天天海南雞飯與328加東叻沙。

雖然活動席捲全城,成為好一陣的熱話,但並非一面倒地讚好,有朋友很用力地批評:「唓,天天海南雞飯係最好食咩?珍寶餐飲集團又係小販咩?」我笑說:「個騷做得好睇熱鬧咪得囉!」當地報章問我有何意見,我又笑說:「咁咪好囉,你哋新加坡贏咗兩仗,國家面子得以保存,星級名廚贏番一場,執番個彩又唔使兩手空空咁瘀,可謂皆大歡喜。」

被邀請到當地電台做嘉賓,我亦笑笑口說:「Gordon Ramsay嘅節目好有娛樂性,作為觀眾我真係覺得係賞心樂事。」節目主持人沒有就此放過我,繼續追問:「言下之意,你只係覺得有娛樂性,同美食鑑賞冇關?」我保持笑笑口說:「新加坡有乜好食、有乜唔好食,你哋都知啦,仲需要一位外國人講畀你知?」

網址:www.chan-wai.com

陳俊偉•旅遊飲食寫作人