限量2,000隻!1:6紅魔雙煞

紅魔鬼曼聯今個月29號嚟香港踢波,雖然波飛一早賣清光,但向隅嘅球迷都唔使失望,因為佢哋會以另一種方式同大家見面。講緊嘅係由ZCWO首度開發嘅1:6 Action Figure,頭炮係曼聯Icons傑斯同朗尼,採用全新橡膠素體之餘,仲可配合磁石波作盤控扭射。各限量2,000隻,正如桂神話齋,今次球迷有福喇!

先出現役球員

近年本港Figure界百花齊放,唔再獨沽一味玩電影角色。而ZCWO取得曼聯官方授權的消息傳出後,小記身邊嘅曼聯躉已經話要訂貨,ZCWO主腦Simon表示︰「曼聯毫無疑問係港人最愛嘅球隊,去年我膽粗粗同佢哋洽談版權,起初佢哋反應都幾保守,但審閱過我嘅舊作後,終於憑質素獲得認可授權。現階段會主力出現役球員,傑斯同朗尼係頭炮,動漫節時會再有尹佩斯試辦,之後希望可出埋簡東拿等經典球星!」

頭雕拿捏神髓

「足球,一係入一係唔入。」但玩Figure,入唔入得過就好睇頭雕。今次傑斯同朗尼頭雕出自韓國IMINIME團隊Rovo Jin之手,坦白講神似度尚有改進空間,但傑斯的高顴骨、尖下巴,以及朗尼嘅史力加面相,都拿捏得到;而且兩者的塗裝自然,鬚根、雀斑都顯而易見。唯一要彈是傑斯未見禿頭,朗尼膚色又過分偏黃,若呢啲位能夠細執便更完美。

波衫傳神有Heart

「做前鋒最緊要有力!」做Body一樣要,兩款Figures的素體除了按照球員真實體形而開發,胸毛、紋身跟到足外,其髖關節、膝關節及腳踭加入了橡膠物料,令扭動擺甫士時更有力,玩得耐都唔怕變「軟腳蟹」!另外,素體的心口和波鞋內藏磁石,配合附送的磁石足球配件,便能做出心口控波、凌空抽射等動作。另一傳神位係波衫,它採用2013/14賽季球衣,徽章、人名同號碼字體幾可亂真,並附送波襪、護Pat、兩對波鞋同6對造型手,加埋個仿真草圓形地台,齋係配件已見誠意。

撰文︰陳志滔

部分攝影︰張錦昌

查詢電話︰2366 2688