4.7吋全高清 P-03E懸浮感應

以前睇《未來報告》，靚佬湯舉起手隔空將畫面左舞右舞，型到震！一直以為這情節只會喺電影出現，但剛由水路抵港嘅日系DoCoMo P-03E，卻把特技變成現實，透過獨家Touch Assist技術，手指唔使掂住屏幕便可隔空解鎖、睇相兼接電話，享受無拘無束嘅快感！

將手指停喺相簿上方，即可預覽相片，方便到暈！售價︰$4,680

畫圓聽電話

懸浮觸控並唔係新鮮事，GALAXY新機早就有Air View及Air Gesture功能；相比起來P-03E嘅Touch Assist應用就全面得多。用家只需將手指放在離屏幕15mm內的位置，再配合不同動作即可下達指令，例如有來電時只要隔空畫圓便可聽電話、手指放在Keyboard上方可預覽字母、上網時向上掃則可撥動網頁等；但最正要數影相功能，只要手指隔空停下來便能叫出快速選單，快門、拍片、放大縮細俱一步到位，操作更直覺輕鬆。

防水30分鐘

由Panasonic代工的P-03E，防水級數達IPX5/7，即於1米水深下運作30分鐘都冇問題。而且全機外露狹縫不多，由microUSB插口到電池蓋內部都有防水膠邊保護，落水前只要閂好介面，基本上是滴水不沾！針對水中拍攝，機身1,340萬像素鏡頭支援Mobile Venus Engine技術及iA智能模式，前者可提升相片清晰度；後者則能自動選擇合適場景，光圈、快門幫你Set好晒，直頭好似同廠LUMIX相機咁方便！

電池容量只有2,600mAh，出街建議帶埋「尿袋」。

厚達10.9mm，幸好四邊微曲有助提升手感。

支援View Blind技術，打側望會見到花紋，謝絕八卦人士。

小視窗睇片

系統方面，以1.7GHz四核心處理器及2GB RAM行Android 4.2，撥頁、開Apps同睇片都好順暢！叫人驚喜嘅係其DoCoMo UI介面對應Pop Up Window，這功能以往是韓國機專利，如今連日系機都玩到，顧名思義可於任何畫面開啟小視窗睇片，而且大細、位置可任意調校，邊上網邊睇片都掂。電池係唯一要改良嘅地方，容量只有2,600mAh未必夠一天應用，幸好機身設有節能模式，開啟後即可熄晒Wi-Fi等非必要裝置，慳電必備。