日產NOTE百公里試煉創34.46km/L新紀錄

入車行睇車，營業員很多時會送上產品介紹書，內裏有詳細規格、性能、油耗等數據。不過，大部分車都話慳油、排放低，你又信幾多？日產（Nissan）最近就搞咗個NOTE慳油比賽，讓車主及傳媒挑戰NOTE DIG-S的慳油極限，經過100km的測試，冠軍做出平均油耗34.46km/L，比廠方公布的24km/L更慳。

NOTE DIG-S

細油慢車唔開冷氣

NOTE向來以慳油見稱，廠方報稱的24km/L平均油耗，原來低處未算低。早前合誠汽車舉辦的「低油耗‧大空間日產NOTE慳油大比併」，有14名車主及傳媒參加，路線由九龍灣出發前往赤鱲角機場，途中須到西貢西沙及屯門青山灣的檢查站登記，在新界兜一個大圈，全程約100km，並須在兩小時內完成。活動當日，早上十時半起陸續出車，所有參加者均能在指定時間內抵達終點。結果，數月前才成為NOTE車主的余先生，以34.46km/L的驚人成績奪冠，賽後直言比賽期間冇開冷氣、冇畀大油及慢慢順住去，上斜都不超過2,000rpm，至於亞季軍分別做出33.16km/L及31.66km/L的不俗成績。

停車自動熄火助節能

NOTE的車主有不少係貪佢夠慳油，但相信冇人估到在本港路面可做出34.46km/L的成績，雖然路線近九成是公路，但在市區的路段有不少燈位，開開停停都能達到$0.48/km，真係「堅料」。本港出售的NOTE DIG-S搭載1.2公升直三超級增壓引擎，導入智能停車熄匙系統。期間停了多個燈位，引擎差不多每次都會自動關上，一滴油都唔使用，冷氣卻可如常運作，稍稍鬆開制動腳踏，引擎會自動重新點火，過程不會為駕駛者帶來額外麻煩。活動結束後，由機場揸車返九龍灣，全程沒有以省油方式駕駛，在北大嶼山公路上把車速提升至110km/h，到達目的地再查看平均油耗，都只係20km/L，不愧為慳油王。

參加者出發前先聽簡介，了解比賽規則及路線。

比賽前到油站「打爆」油缸，並由工作人員記錄里數。

車身短小內櫳闊落

NOTE不但標榜「低油耗」，還強調「大空間」，說到這兩點，的確「牙擦」得起，車廂總長度達到2,065mm，後座乘客的腿部伸展空間甚至可媲美中型房車，不信的話不妨去Showroom睇睇，反正唔使錢，當是周末娛樂也不錯。此外，車門的開啟角度接近直角的85度，車內又有大量儲物空間、行李箱容積更達到330L，無論實用性及使用方便度都非常高水準。目前，NOTE DIG-S已獲政府認可為環保汽油私家車，可享45%汽車首次登記稅優惠，車價為$176,800起，性價比甚高。