高達格鬥遊戲多到數唔晒，若然NAMCO Bandai Games只追加新機體便草草推出新作，肯定會被粉絲鬧爆！有見及此，《Gundam Breaker》改玩Gunpla（高達模型）對戰，透過打倒敵機來收集模型組件，讓玩家砌出千變萬化的心水戰機。最過癮係連戰場背景都變成情景模型，機體喺咁嘅環境下打交夠晒新鮮感！
以往的高達對戰遊戲，總會有精細機體畫面，以及流暢戰鬥系統，反觀《Gundam Breaker》唔用實機改玩模型，因此造型較為粗糙，質感愈「膠」愈逼真，仲慳水慳力唔使搞光影特效；加上機體被擊中時，畫面也以撞散模型來表達，連背景也從都市戰場變成模型工作間、Bandai靜岡總部、東京台場Diver City等，來一場別開生面的「膠達」混戰！
砌開高達都知，模型有分為HG（1:144）、MG（1:100）、PG（1:60）不同比例，而遊戲能實現不同比例的模型互相駁火。玩家可在「VR HANGAR」承接任務，從敵方機體身上收集配件，由HG渣古至PG高達嘅配件都有得執，而且戰後組裝時，能無視配件比例來裝嵌，例如將MG手臂裝落HG身軀，炮製出獨特的「巨手高達」，仲可以用噴漆改色、上光油甚至作舊化塗裝。如累積夠戰鬥點數更可兌換「轉印貼紙」，為心愛模型貼上醒目標記。
戰鬥系統方面，新作也設計得相當易上手，如在瞄準目標時，玩家可利用R2加左右搖桿來轉動鏡頭，拉下時作鎖定近目標，拉上則鎖定遠目標，按動R3便解除瞄準狀態，這簡便操控令玩家在混戰時能集中攻擊單一敵人。而每款武器也有專屬必殺技「EX攻擊」，只要儲夠經驗便可習得，為機體植入特殊戰鬥技巧。此外，遊戲支援最多4人連線，最啱與好友一同挑戰上級任務，就算是單機玩時，亦可因應任務難度而有NPC機體支援，相當貼心。
DETAILS
類 型：格鬥動作
發 行：NAMCO Bandai Games
平 台：PS3
人 數：1人（支援4人連線）
推出日期：6月27日
售 價：7,980日圓
查詢電話：2782 0978
撰文：廖俊斌