MINI Cooper S Works-Edition限量限量新型酷

MINI又有嘢玩！繼今年推出多款特別版本後，近日又來一款MINI Cooper S Works-Edition，廠方每次推出新車都有不同的賣點，今次加入大量改裝部門JCW配件後，賣相型仔，富有跑味，加上特別版本兩種專屬顏色，其中試駕車的鮮紅車身，完全與火辣炎夏襯到絕，MINI車迷又點可以錯過呢！但要溫馨提示大家，數量相當有限，限量10輛，唔好諗咁耐呀！

MINI Cooper S Works-Edition 售價：$388,800起

JCW配件爆出跑味

MINI每隔一段時間出新搞作，這絕對是好事，可以為車迷帶來新鮮感，還有是駕駛限量車款，惹來的「注目禮」又可以帶來滿足感。所以每次MINI玩特別款式，隨即掀起熱潮。這個夏天平均氣溫超過30度，實在熱到飛起，再望望這台鮮紅色的MINI Cooper S Works-Edition，應該已經血脈沸騰了。不錯，今次香港引入限量10輛的特別版本，原車型是Cooper S，但加入大量JCW配件，令跑味大爆發至頂點。為了讓車迷有更多選擇，特別推出兩種車身色調，除了今次拍攝的Chille Red紅身黑頂，簡單地流露「紅潮酷黑」外；至於另一選擇係Midnight Black黑車身配白車頂，同樣帶來了視覺上的強烈對比，完全符合鍾意玩「性格」的朋友。

包多項增值設備

Cooper S向來受歡迎，經專屬改裝部門JCW提供各種跑化配件後，打造的Works-Edition既型且辣。細心的車迷一看便知，外形上加入了全套JCW原廠包圍連裙腳，車身仿似Load低了一樣；17吋JCW Cross Spoke Challenge鋁合金輪圈，如像穿上跑鞋。打開車門即見搶眼的JCW門檻。車廂方面，兩幅式天窗天幕，令車廂開揚度大增，同朋友去遊車河，盡情打開天窗說笑話！為了加強跑味，配上黑色內櫳及電鍍裝飾，配合全真皮座椅，帶來舒適豪華的感覺。多用途軚環配上加減波撥片，增加了操控樂趣，還有泊車更方便的泊車距離警報系統（PDC），一口氣數到咁多增值配備，別以為車價會貴到冇朋友，就算限量版都只係$388,800起，實在有相當大的吸引力。

加入全套JCW包圍，加上中置式雙出排氣喉，一派跑格。

真皮座椅配黑色主調的車廂，潮味十足。

操控玩樂味濃

MINI的特點除了外形顏色配搭變化多端外，其Go Kart的操控特性亦令人印象深刻，全套JCW包圍以及配上了運動型強化懸掛系統後，提升了穩定及操控性，尤其是攻彎行駛時，低重心的車體讓操控更自如，並帶來高速的穩定性，玩樂味更濃。搭配的1.6公升直四Turbo引擎，可輸出的最大馬力及扭力分別是184hp及240Nm，假如啟動Overboost功能採用大油起步的話，強大扭力可增加至260Nm，起步應聲彈出，加速強悍有力。當然，除了性能外，這個年代亦講究環保，直四引擎除了可提供充裕的動力外，油耗亦十分經濟，廠方公布的綜合耗油量為6.4L/100km，大約$1.1走1公里，這個實屬抵玩價錢，還有限量特別版保值力強，有興趣的車迷要快手入貨了。