Honda Stepwgn家推七座版

有時啲嘢，多唔一定好，最緊要係適合自己，若家中只有五、六名成員，七座MPV已經Fit晒，八座MPV根本用不着，車廂又要預留位置擺多張櫈，空間都少啲啦。本田（Honda）最近引進了七座版Stepwgn，中排換上兩張獨立座椅，唔只腿部伸展空間充足，還附設手枕，坐起來歎得多！

售價：待定

Idle Stop有助省油

油費是養車成本其中一項主要開支，如果每日揸車返工、假日又要載岳母去街飲茶，每月油費認真唔少嘢，所以揀七人車唔只要考慮外觀、性能、空間和設備，仲要計埋耗油量呢一瓣。全新Stepwgn應用了本田的Earth Dreams Technology，從i-VTEC引擎、無段變速波箱、車架設計以至內櫳布局都以省油表現為主，配合智能怠速停止系統（Idle Stop），以現時日本最新的「JC 08」輕型汽車測試標準，每公升油可行駛14.4km，計落只係$1.2/km左右。Idle Stop是Stepwgn減省油耗的利器，停車等候時會自動關閉引擎，期間一滴油都唔使用，但冷氣卻可如常運作，係咪正先？

一梯級地台方便上落

不難發現，街上見到的MPV都以日系車為主，歐洲車不好嗎？當然不是，雙電動趟門、後排冷氣等已是基本設備，人人皆有，只能說日系MPV的設計及使用上，相對更能迎合本港用家口味。就如全新的七座Stepwgn，內櫳布局便非常User-friendly，想收摺中、後排座椅，三幾個動作就搞掂，要將後排收藏在地台底，只需要一拉、一扳、一扣便辦妥，整個過程都不用5秒，而且不費吹灰之力。同時，廠方還考慮到上落的便利性，不但採用同級獨有的一梯級式地台，地台更低至390mm，即使長者也可輕易上車，加上車頂比房車高，進出車廂自然方便得多。

採用一梯級式地台設計，上落方便過人。

放大圖片

後排非常寬敞，腿部伸展空間充足。

HSA斜路起步不溜後

全車載滿人是很大負荷，加埋閒閒哋有三、四百公斤，所以性能絕不能太弱，上斜搞到「拉牛上樹」就不太好了。大馬力當然好，卻衍生高油耗問題，除非本身財力雄厚，否則應取中庸之道，起碼油費、牌費、保險費都平啲。Stepwgn搭載2.0公升i-VTEC引擎，可輸出150ps馬力，配上經過重新調校的無段變速波箱，力量足以應付全港路段，加速暢順度亦比上代好，乘坐質素更上一層樓。同時，斜坡發進輔助系統（HSA）更列為標準配置，於清水灣道（德望對開）的燈位起步，右腳鬆開迫力，再施施然移過油門畀油，並刻意拖慢動作，大斜坡都沒有溜後，帶來不少駕駛上的便利性。

中排換上兩張獨立座椅，每張櫈都設有左右手枕。	把後座完全收藏在地台底，載物空間立即大增。	軚環設計富立體感，而且可控制行車資訊。
車頂設有巨型天幕，全車乘客都可享開揚景致。	尾牌上方裝了鏡頭，倒後泊車輕鬆得多。	A柱下方設有反射鏡，左邊車頭與阻礙物距離一目了然。