LA9600 2.9mm無邊視野

LG首部曲面OLED TV喺韓國終於有得訂，雖然香港暫時未有聲氣，但近日出咗部55吋旗艦級Cinema 3D Smart TV LA9600，用上業界最幼2.9mm邊框設計，觀感上已好Borderless。新機仲可配上Magic Remote遙控器，喺YouTube聲控搵片，亦可對住鏡頭以手勢操控調校音量，趣味滿分！

售價：$38,980

極幼邊框設計創新

今年電視界雖然以Ultra HD TV同OLED TV作主導，但講真一句，4K內容有排都未普及，若唔刻意追趕潮流，倒不如用合理價錢買番部頂級Smart TV好過。LA9600屬2013年新機，延續去年嘅幼邊框潮流，今年更將邊框標準降至2.9mm，基本上要哄埋電視旁先會發現條邊嘅存在，一般睇電視距離就有「無邊」感覺，觀感極佳。新機更植入Nano Full LED背光技術，令光源顯示得更平均，小記實試夜景畫面時，暗位層次表現極為細緻。

聲控搜尋睇YouTube

LA9600換咗個銀色Magic Remote遙控器，雖然外形同上代有九成接近，同樣可當成Pointer指住電視玩Apps，但功能進一步提升。其一是在遙控器中央加入滾輪設計，上下捲軸網頁變得更方便；另備有聲控按鈕，只要撳實個掣便能進入聲控畫面，可以對住遙控器讀出想搜尋嘅關鍵詞，小記試過講「東方日報」搵片，發覺其準確性相當不俗，中文字基本上都認得到，不過中英夾雜時就偶有出錯啦。唔想用遙控器的話，電視機頂隱藏了Pop-up Camera，可以用佢偵測手勢操控，調校音量或者轉台都掂，操作時反應尚可接受。

對應Miracast功能，啟動後即可跟兼容的手機連接。

聲控輸入的辨認率唔錯，但使用時一定要將電視連上網絡。

在聲控功能下讀出「東方日報」，即可搜尋到相關短片。

對應Miracast無線技術

將智能裝置嘅內容串流到電視播放，亦係2013年電視大趨勢。新機支援多種連接方法，除咗常見嘅MHL外，亦兼容到Miracast同Tag On兩種無線連接技術。Miracast可以點對點方式，將手機影片或相片串流到電視，同時唔會妨礙手機嘅正常操作；現時大部分高階Android手機都支援此功能。至於Tag On則以NFC方式，將Android手機跟電視無線連接，惟發布會當日仲未玩到Tag On功能，值得期待。

用手掌即可以體感功能操控電視，如調校音量及選台等。	Magic Remote內置收音咪，可聲控輸入文字。	從鳥瞰角度觀察，可見LA9600底座用上特別的Magic Swivel設計。
電視頂部隱藏Pop-up Camera，用來偵測體感操作。	LA9600屏幕邊框極幼，係目前業界之最。	同場另一款Cinema 3D Smart TV LA6800屬入門級型號，換上紅色邊框，而Magic Remote也貫徹地用上紅色。售價：$11,680（42吋）、$14,980（47吋）、$23,980（55吋）
試片區以廠方的夜景試片，由於植入Nano Full LED背光技術，令層次表現更出色。