儲分搵食 無卡勝有卡

手機「嘟」咖啡

去Starbucks飲咖啡，唔少人會開番張「星巴克卡」，可以增值當錢埋單之餘，仲可順道儲星換獎賞。而最近更不時見到人用手機去「嘟」咖啡，原來佢哋新出咗《Starbucks Hong Kong》App，入面除咗有齊分店、Menu呢啲資料外，最方便係整合咗會員卡功能，可以喺App內為帳戶增值，又可即時查閱積分和獎賞，仲能夠直接用App畀錢！

優惠誘用家

隻App新鮮上架，當然要問吓香港及澳門星巴克行政總監曾廣堅（Norbert）為何有此概念。他表示：「唔少客人都試過唔記得帶會員卡，新App便可All-In-One有齊所有功能；仲吸引咗唔少新客幫襯，因為佢哋見到原來會員有咁多優惠，於是都下載試吓。」難怪此App一上架便佔據免費排行榜嘅前列位置。

Step by Step教你玩 首先將星巴克卡的會員資料登入App內，一個App可同時管理幾個星巴克卡帳戶。

買咖啡時一撳付款，畫面便會彈出條碼，交畀店員可用來埋單；最正係帳戶餘額可以喺其他有參與「星巴克卡計劃」嘅國家如美國、英國、澳洲等按當地匯率使用。

《Starbucks Hong Kong》

售價：免費
平台：iOS、Android

以前一定要喺電腦上網先睇到餘額等資料，依家喺App登入帳戶就睇到晒。

黃明威（Willy）

搵食工具推介

《Ippudo Passport》收集印花嘗拉麵

去一風堂食完拉麵，埋單時掃描App內嘅通行證條碼便可攞到「拉麵印花」，儲齊一套6款仲會請你食拉麵。而獎賞將分階段進行，由即日起到6月2日為第一階段，儲齊6款「拉麵印花」會攞到「一風堂徽章」，攞晒5個階段徽章仲有機會抽到日本機票連酒店！

售價：免費

平台：iOS、Android

《元氣壽司 Genki Sushi》遙距攞籌賺時間

香港嘅壽司舖成日大排長龍，攞完飛仔又唔知等幾耐。如果你係元氣壽司會員的話，便可用呢個App玩遙距攞飛仔等位，有位時即刻有電話通知你。而且會員仲可以隨時Check埋「元气の賞分」，有咩迎新禮券、會員禮物、生日優惠都冇走雞。

售價：免費

平台：iOS、Android

精明貼士：記得Log Out

App開發商MTel CEO黃明威（Willy）表示：「電子印花其實唔係新鮮事，喺外國如《Foursquare》（以Location Based服務作行銷的平台）好早已經玩緊。不過呢類Apps幾方便，因為結合晒付款、儲分等功能，肯定係未來大趨勢。」亦由於Apps內儲咗好多個人資料，他建議各位不要貪方便將帳戶長期登入，每次用完記住要Log Out，以免資料外洩。

飛走會員卡 積分（目及）到實

娛樂類：《UA Cinemas》

售價：免費

會員可透過App查閱積分及交易紀錄，亦可即時買飛，兼以優惠價買小食。

購物類：《Watsons HK》

售價：免費

會員可隨時查詢「易賞錢」積分同紀錄，積分可作換取禮品之用。

旅遊類：《China Airlines》

售價：免費

可以訂機票、預辦登機之外，仲提供不同機票優惠，會員亦可瀏覽Mileage積分資料。

撰文：林子聰

部分攝影：郭凱敏

模特兒：Crztal To