K-Pop文化盛行，有的Sell騎呢搞笑，有的以長腿誘人。而香港亦有人靠K-Pop上位，人稱「大佬B」嘅Brenda，原先只喺網上教人化妝技巧，直至「喬妝」模仿韓星如泫雅、IU等，短時間由寂寂無聞嘅Blogger搖身一變成爆紅YouTuber，更吸引到不少公司贊助及邀請出席活動，絕對係網友上位嘅好例子。

原來Brenda喺中學時期係一名140磅嘅肥妹，笑言「知個醜字點寫」便積極減肥，更開始自學化妝。累積多年心得後，遂於2010年寫Blog分享化妝技巧，網頁由Xanga到theZtyle，內容由純文字到靚相，慢慢「儲落」不少讀者。可是以文字和相片教化妝，有很多讀者都唔明當中過程與細節，所以她嘗試轉型拍YouTube：「有個美籍越南裔靚女Michelle Phan喺YouTube教人化妝，結果全球大熱，我梗係想做港版嘅佢啦！」

修讀設計嘅Brenda，對短片嘅美學要求甚高：「片長7分鐘嘅短片，拍攝時間大約要2小時，之後要用4小時做剪接及後期製作。」小記眼見短片不但拍得有水準，背景音樂、字幕、插圖都由她一手包辦，製作超認真。「我初期上載嘅短片多以大路題材為主，好似返工妝速變晚妝、最快捷旅行妝等，可能當時網上已有不少名人拍片教過，自己又唔出名，搞到一開始只得3、4個Like咋！」

現時Brenda的YouTube專頁觀看次數逾750萬，這驚人數字的轉捩點是來自K-Pop妝。她表示：「當時諗住擺脫以往Daily Makeup嘅框框，於是決定學日本雜誌化咗3個潮妝，點知反應幾好；適逢《江南Style》爆紅，便嘗試以MV嘅女主角泫雅進行仿妝（即模仿化妝）。」別以為扮韓星很容易，她續道：「首先要搵泫雅嘅MV和相片，睇吓佢嘅化妝重點，再畫出Face Chart了解其面部輪廓。可能我學過設計，所以對顏色和線條敏感啲。之後要執齊所需嘅化妝品、衣服和配件。」前後兩段泫雅仿妝短片的觀看次數都超過30萬，她笑言「有人睇你台戲」，勁有成功感！

相比其他教化妝嘅YouTuber，Brenda唔介意以醜態、化妝前嘅容貌示人，搞笑手法亦具話題性，不過她堅持忠於自己。這份堅持更吸引到不少品牌贊助。「最多係美容品牌，會叫你試用吓啲產品，又或者出席美容活動。」而她強調，試過唔好用嘅一定唔會介紹。除了本地活動，她更曾受邀出席2011年馬來西亞Nuffnang Asia-Pacific Blog Awards，與各國網友交流。她透露，下一步會試吓模仿外國明星好似Taylor Swift，以及出多幾本化妝書。「我嘅目標係有多啲外國粉絲，實行衝出香港！」

「Brenda拍嘅片好易跟到節奏，而且題材係依家流行嘅韓妝、仿妝。佢本身皮膚夠白，所以玩韓妝特別似，不過香港人普遍膚色較黃，遲吓可以嘗試教人相關仿妝技巧，受眾自然會多啲。不過我覺得Brenda嘅影片時間長咗少少，剪到4分鐘左右片長就更加好啦！」

Michelle Phan於2006年開始在YouTube上載美容化妝教學短片，其頻道有超過370萬位訂閱者及逾7億觀看次數。2010年受聘於Lancôme擔任Video Makeup Artist。

網址：www.youtube.com/user/MichellePhan

撰文：林子聰

攝影：胡振文（部分相片由受訪者提供）