PowerShot N鏡環當快門反轉玩味

期待已久的Canon PowerShot N終於抵港，新機大玩可愛設計和Free Style操控，創新於鏡頭外圍加入控制環，令影相動作不再受限制，就算部機打橫、打直甚至倒轉都可輕易影到靚相。另新增盞鬼嘅創意拍攝模式，會隨機拍出5種特效，趣味爆燈。

想以高角度拍攝時，可上下反轉部機用控制環影相。

上下按壓影相

一直以來，唔少DC都標榜外形設計，但總離不開長長方方的框架，PowerShot N卻打破傳統以接近四方造型，將鏡頭放於正中，正面睇有啲似Instagram個嘜頭。設計咁新穎，又唔見咗手柄和快門，咁樣點揸機影相呢？其實新機沒有固定揸法，以單手、雙手、左右手甚至反轉使用都冇問題，皆因機身8倍變焦鏡頭的外圍設有控制環，扭一扭內環便可變焦，上下按壓外環便可當快門影相，難怪搵唔到傳統的快門鍵和變焦桿。

90度翻芒取景

新機為了配合控制環設計，特別用上可90度翻揭的觸控屏幕，不但支援篤芒拍攝，仲方便以高低角度取景。大家有否覺得奇怪，90度翻起屏幕用來低抄就講得通，點樣可以高抄目標呢？奧妙之處係上下反轉部機用，這樣屏幕就會變成向下翻90度。用家可以按壓控制環的快門影相，又或者利用觸控屏幕當快門，所以反轉部機影相都冇問題，設計夠心思。

備有光面的白色及磨沙面的黑色機身選擇。
售價：$2,680 /各

2.8吋屏幕可上翻90度，取景角度更靈活。

主要按鍵設於機側，由上至下為拍攝模式鍵、Wi-Fi鍵和播放鍵。

創意拍攝模式

減省快門鍵和變焦桿，新機僅餘下拍攝模式鍵、Wi-Fi鍵、重播和開關幾個按鈕。當中最好玩嘅地方係內置創意拍攝模式（Creative Shot），影相時不但會記錄原相，還衍生出5張加入隨機特效的影像，有啲可能加黑角、有啲經過裁剪同旋轉，又或者Chok出彩虹效果，每次都有唔同驚喜，效果仲相當唔錯。如想同好友分享咁有趣嘅相片，還可經內置Wi-Fi傳至智能手機或平板電腦，傳相速度仲幾快添。