唔少人都想幫部車整靚個樣、甚至裝番套包圍，惟坊間套件未必Fit位，隨時使完錢卻換來一肚氣。假如閣下是寶馬（BMW）3系的Fans，可要留意全新抵港的328iA Saloon M Sport SE，除咗車身及內飾都裝上M系配件，使賣相更富跑格外，連懸掛都用上M Sport出品，避震行程縮短了10mm，而且比Sport版更硬朗進取，彎路性能得到進一步增強，大大提升駕駛樂趣。

這套專為新3系設計的M Sport Package，令動感形象強化，改裝包括車身包圍、輪圈、排氣尾管及內飾等，對於用不着M3咁大Power，又想部車夠型、夠跑格，全新328iA M Sport版本無疑是Right Choice，單是望見車頭的大面積進氣口及18吋M輕量化合金輪圈，即使車子不動都可感受到侵略性。至於車身尺碼亦放大，唔只外觀看來更有霸氣，車廂空間亦有所增長，在軸距增加至2,810mm下，後排乘客腿部空間足足多了15mm，6呎高人坐後都唔會頂腳，感覺比上代闊落得多。此外，由於大量運用輕量化套件，儘管車身體積比上代大，但車重卻更輕，配合八前速波箱及Auto Start/Stop等系統，綜合油耗可低至6.3L/100km，二氧化碳排放量更只有147g/km。

近年BMW旗下多個車系都廣泛應用TwinPower Turbo技術，新車容積只有1,997c.c.，馬力卻高達245hp，350Nm峰值扭力早於1,250rpm全數釋出，而且一直維持到4,800rpm，與以往的六汽缸自然吸氣引擎相比，最大扭力早很多湧現，即使處於超低轉速，只要深踏油門便有理想加速，毋須拖波谷高轉數先有反應，段段都咁好爆，廠方公布的0~100km/h只需6.1秒。以「D」檔在公路行車，波箱三扒兩撥已升上八檔，以每小時80km巡航，轉速可低於1,500rpm，對減低油耗有莫大幫助。當駛至多彎山路，畀油與落Brake交替次數較頻密，以相若車速行駛，波箱不會貿然升上八檔，反而識得保持在三至五檔間，落斜加大制動還會自動拖波。當然，還可透過軚環後方撥片，控制波檔升降。

328iA M Sport版本配備了Driving Experience Control，在「SPORT」模式下，波箱會保持較低檔位、油門反應更為敏銳，起油速度更加爽快，只用「D」檔輕鬆跑下山路已非常好玩。相反，如果想慳油減排，只要簡單切換至「ECO PRO」模式便可，引擎輸出會稍為降低，而且會提早升檔，即使把油門踩到底，引擎都不會全力加速，最多可節省高達20%油耗。車廂方面，多個部分都換上M Sport Package的配件，如多功能真皮軚環、前排運動型座椅、腳踏以至金屬門檻都是M出品，加上試駕車用上紅色皮椅，內外都散發着濃烈的運動氣息。目前，代理已將藍芽系統、iDrive連6.5吋屏幕、天窗及Bi-Xenon頭燈列為新車的標準配備，售價為$558,000起。

車　　型：四門五座位房車

引　　擎：直四TwinPower Turbo

容　　積：1,997c.c.

最大馬力：245hp/5,000~6,500rpm

最大扭力：350Nm/1,250~4,800rpm

傳　　動：八前速Steptronic自動波

驅　　動：前置引擎、後輪驅動

車身體積：4,624×1,811×1,429mm（長×闊×高）

撰文：鄭浩文

攝影：謝孝祥

查詢電話：3129 9000（BMW HK）